15 саастаах оҕо уруучука хаппаҕын ыйыстыбыт…

Амма улууһугар 15 саастаах оҕо уруучука хаппаҕын ыйыстан тыына хаайтаран быраастарга көрдөрө тиийбит. Бу туһунан СИА суруйар.

Уруучука хаппаҕа оҕо уҥа бронхатыгар кыбыллан хаалбыт. Бу туһунан Амма улууһун киин балыыһатын кылаабынай бырааһа Михаил Архипов иһитиннэрдэ.

Эмсэҕэлээбит оҕо иһитиннэрбитинэн, кини уруучука хаппаҕын алҕас ыйыстыбыт. Оҕолор уруучука хаппаҕын үөһээ быраҕаттыы-быраҕаттыы айахтарынан хаба  оонньообуттар. Ити барыта күнүс буолбут, оттон оҕо быраастарга киэһэ биирдэ тиийбит.

КТ чинчийиигэ көрбүттэрэ  оҕо уҥа тыҥатыгар уруучука хаппаҕын баар эбит. Быраастар СӨ Национальнай мэдиссиинэ киинин кытта сүбэлэспиттэр. Аммаҕа эндоскопическай чинчийии  салаатын сэбиэдиссэйэ Мария Еремеева тиийбит. Ол курдук 3 см уһуннаах хаппаҕы оҕо тыҥатыттан ылбыттар.

Билиҥҥи туругунан уолчаан туруга этэҥҥэ. Эпэрээссийэ этэҥҥэ ааспыт.

«Уруучука хаппаҕа оҕо тыынар уорганын бүтүннүү бүөлүү түһүөн сөбө. Өр сылдьыбыта буоллар сүһүрэн да барыан сөбө», — диэн кылаабынай быраас Михаил Архипов кэпсээбитин СИА суруйар.