15 саастаах уол оҕо массыынаны күрэтиигэ уорбаланар

Дьокуускай куорат полицейскайдара массыынаны күрэтии дьыалатын арыйдылар.

Олохтоох эр киһи массыынатын күрэппиттэрин туһунан полиция дьуһуурунай чааһыгар сайабылыанньа  суруйбут. Киин куоракка Лермонтов уулуссаҕа биир дьиэтин тиэргэниттэн кини «ВАЗ-2106»  массыынатын күрэтэн илдьэ барбыттар.  Буруйу оҥорууну арыйыыга отдел оперативниктара холуобунай ирдэбил үлэһиттэрин кытта уорбаланааччыны туппуттар. Буруйданааччы урут сууттана сылдьыбыт сокуоннай сааһын ситэ илик 15 саастаах уол оҕо буолара биллибит.

«Уорбаланааччы олбуор иһигэр тохтобулга турар массыына аана хатаммакка уонна күлүүһэ холбонон турарын бэлиэтии көрбүт. Уорбаланааччы салоҥҥа киирэн массыынаны собуоттаан, күрэтэн илдьэ барбыт. Ол гынан баран, массыына Яков Потапов аатынан уулусса оройуонугар умуллубут, онон хаалларан куотан барбыт», — диэн Саха сиринээҕи ИДьМ пресс-сулууспата иһитиннэрэр.