Игнат Чомчоев «ГТО оонньуулара» аһаҕас Куубагын чөмпүйүөнэ буолла

Саха спортсмена Игнат Чомчоев професионаллар ортолоругар «ГТО оонньуулара» Уһук Илиҥҥи үһүс аһаҕас Куубагын чөмпүйүөнэ буолла.

Владивостокка Куубак оонньуута Илиҥҥи экэнэмиичэскэй пуорум иһинэн ыытылынна. Бу туһунан Ил Дархан Айсен Николаев ТГ-ханаалыгар суруйда.

«Игнат бу кыайыыны ситиһэргэ икки сылы быһа бэлэмнэммитэ. 2022 сыллаахха кини төрдүс миэстэни ылбыта, былырыын үрүҥ көмүс мэтээлгэ тиксибитэ. Дьэ, быйыл күүтүүлээх кыһыл көмүс мэтээли ылары ситистэ! Бүгүн чөмпүйүөнү видеозвоногунан эрийэн эҕэрдэлээтим. Игнат кыайыыга дьулуурунан уонна дьаныардаах буолан, өссө төгүл илэ бэйэтин кыайыыга дьулуурунан дакаастаата. Ситиһиитинэн эҕэрдэлиибин уонна саҥа, чаҕылхай ситиһиилэри уонна кыайыыны баҕарабын! Саха сирэ киэн туттар!» ,- диэн Айсен Николаев суруйда.

Санатан эттэххэ, күрэхтэһии биэс күн устата ыытылынна. Онно  Уһук Илин федеральнай уокурук 11 субъегын бэрэстэбиитэллэрэ, ол иһигэр ГТО хас да төгүллээх кыайыылаахтара уонна призердара кытыннылар.