Саха сирин психоневрологическай диспансерын кылаабынай бырааһа Лука Крымскай мэтээлинэн наҕараадаланна

Дойду Бэрэсидьиэнэ Владимир Путин Ыйааҕынан Өрөспүүбүлүкэтээҕи психоневрологическай диспансер (ЯРПНД) кылаабынай бырааһа Туяра Решетникова Лука Крымскай мэтээлинэн наҕараадаланна.

Быраас байыаннай дьайыы кыттыылаахтарыгар байыаннай госпитальга көмө оҥорбут. Туяра Решетникова кэпсииринэн, наҕараада диспансер бары эмчиттэрин үлэлэрин-хамнастарын улахан билиниитэ буолар. Мэтээл бырааска экстремальнай усулуобуйаҕа мэдиссиинэ көмөтүн оҥорууга көрдөрбүт үрдүк профессионализмын иһин ананар.

«Мин Ростовка байыаннай госпитальга 2022 сыллаахха үлэлээбитим. Бүгүн сарсыарда наҕараада анаммытын туһунан биллим. Бырабыыталыстыбаҕа психиатрическай сулууспаҕа болҕомтолорун иһин махтаныахпын баҕарабын. Наҕараада бүтүн хамаанда үлэтин билиниитэ буолар. Биир идэлээхтэрбэр үлэлэрин иһин махтанабын. Саха сирин психиатр-быраастара биир бастакынан байыаннай дьайыы хонуутугар фронт госпиталыгар көмөлөһө айаннаабыттара. Онно бары бааһырбыт дьон киирэллэрэ. Байыаннай сулууспалаахтары өйүүр үлэ салҕанар, билигин биригээдэ Петербург госпиталыгар үлэлиир», — диэн Туяра Решетникова иһитиннэрдэ.