Хаҥаласка Анатолий Добрянцев туһунан ахтыы киэһэтэ ыытыллыаҕа

Алтынньы 11 күнүгэр Покровскайга Ил Түмэн  V ыҥырыытын дьокутаата, Ил Түмэн бэрэссэдээтэлин бастакы солбуйааччы, биллиилээх судаарыстыбаннай-бэлитиичэскэй диэйэтэл Анатолий Добрянцев сырдык кэриэһигэр анаммыт “Хаҥалас патриота” ахтыы киэһэтэ ыытыллыаҕа.

Бу туһунан Хаҥалас улууһун дьаһалтата  иһитиннэрэр. Анатолий Анатольевич Добрянцев Муома улууһугар зоотехнигынан, сопхуос дириэктэринэн, Аллараа Халымаҕа  улуус баһылыгын бастакы солбуйааччынан, төрөөбүт Хаҥалаһыгар улуус баһылыгынан, салгыы СӨ Айылҕа харыстабылын миниистирин бастакы солбуйааччынан бэрт таһаарыылаахтык үлэлээбитэ.

Кэлин норуот дьокутаатынан талыллан, 2013 сыл алтынньы 2 күнүттэн Ил Түмэн бэрэссэдээтэлин бастакы солбуйааччынан үлэлээн, өрөспүүбүлүкэ олохтоохторугар үтүө өйдөбүлү хаалларбыта, Саха Сирин сайдыытыгар, норуоттар доҕордоһуулара бөҕөргүүрүгэр улахан кылааты киллэрбитэ. Кини 2022 сыл бэс ыйыгар ыалдьан олохтон барбыта.