16 туонна сэлии муоһун контрабаандалаабыт урбаанньыттар холуобунай дьыалаларын силиэстийэтэ түмүктэннэ

Арассыыйа ИДьМ Уһук Илиҥҥэ тырааныспарга управлениетын силиэдэбэтэллэрэ 16 туонна сэлии муоһун контрабаандалаабыт урбаанньыттар холуобунай дьыалаларын барыллаан силиэстийэтин түмүктээтилэр. 

Силиэстийэ дааннайдарынан, 2022 сыллаахха икки урбаанньыт Саха сириттэн уонна Чукоткаттан докумуоннаспакка эрэ сэлии муоһун атыыласпыттар.

«Бу дьыала фигураннара Чукотскай автономнай уокурукка палеонтологическай матырыйааллары хомуйарга лиссиэнсийэлээхтэр. Ону туһананнар, сэлии муостара экспортка барарыгар тустаах докумуоннаах диэн оҥоро сылдьыбыттар. Ол түмүгэр РФ таһыттан сокуоннайа суохтук 16 туонна сэлии муоһа уонна эттиктэрэ тахсыбыттар. Бу уопсай суумата 113 мөл.солк. тэҥнэһэр», — диэн Арассыыйа ИДьМ-ын официальнай бэрэстэбиитэлэ Ирина Волк иһитиннэрбит.

Контрабаанда туһунан 2023 сыллаахха муус устарга Хабаровскай таможнятыгар биллибит.

Холуобунай дьыала Уһук Илиҥҥи тырааныспар борокуратууратыгар тиксэрилиннэ.