16 тыһ. тахса оҕо маҥнайгы кылааска киириэҕэ

Бүгүн – Билии күнэ. Дойду үрдүнэн үөрүүлээх тэрээһиннэр буолаллар. Быйыл Саха сиригэр 16 тыһ. тахса кырачаан оскуола боруогун аан маҥнай атыллыаҕа.

СӨ Үөрэҕин уонна билимин министиэристибэтэ иһитиннэрэринэн, 2023-2024 үөрэх дьылыгар бастакы кылааска 16 тыһ. тахса оҕо киириэҕэ, 7 тыһ. кэриҥэ киһи орто, 6,5 тыһ. тахса киһи үрдүк үөрэх устудьуона аатын сүктүлэр.

Күн бүгүн өрөспүүбүлүкэҕэ 634 оскуола, 756 уһуйаан, 42 орто үөрэх, 6 үрдүк үөрэх үлэлиир. Онно 153 тыһ. тахса оскуола оҕото, 68 тыһ. тахса уһуйаан иитиллээччитэ, 24 тыһ. тахса орто, эмиэ итиччэ үрдүк үөрэх устудьуона үөрэнэр, сылдьар.

Быйыл “Оскуола үөрэҕин систиэмэтин уларытыы” федеральнай бырагыраама иитинэн 57 оскуолаҕа хапытаалынай өрөмүөн ыытылынна.

“Хас биирдии оҕо ситиһиитэ” федеральнай бырайыагынан 4 тыа сирин оскуолатын спортивнай саалата өрөмүөннэннэ, 1 оскуола аудиториятын спортивнай саалаҕа уларыттылар, 11 оскуолаҕа өрөмүөн ыытыллыбыт уонна аһаҕас спортивнай тутуу тэрилинэн, 36 оскуоланы успуорт тэрилинэн хааччыйбыттар, 66 оскуолаҕа “Үүннүү туочуката” гуманитарнай уонна цифровой үөрэх киинин аһаллар.

Оҕо үөрэнэригэр, үүнэригэр-сайдарыгар сыллата усулуобуйаны тупсаран иһэллэр. Уонтан итэҕэһэ суох оскуоланы туталлар.