16 тыһыынча ыал «100 сыл оҕолоро» хапытаалы ылла

Саха АССР олохтоммут 100 сылын көрсө, 2022 сыллаахха Ил Дархан саҥа төрөөбүт оҕолорго «100 сыл оҕолоро» хапытаалы олохтообута. 2024 сылтан бу хапытаалы 16 357 дьиэ кэргэн ылла. 

2025 сыл тохсунньутугар 1553 ыал хапытаалы номнуо ылла. Быйыл бу хапытаал суумата үрдээн, 116 тыһыынча 756 солкуобайга тэҥнэстэ.

Хапытаалы ылыы мэхэньиисимэ судургутуйда, туһаныы көрүҥэ кэҥээтэ. Хапытаалы ыларга сайабылыанньа суруйар ирдэммэт. Төрөппүттэр Арассыыйа гражданнара уонна Саха сиригэр бастайааннай бырапыыскалаах буолуохтаахтар. ЗАГС уорганыттан оҕо төрөөбүтүн туһунан сибидиэтэлистибэни ыллахтарына, ананар. Хаһыс төрөөбүтүттэн тутулуга суох, хас биирдии оҕоҕо бэриллэр.

5741 ыал олорор дьиэ усулуобуйатын тупсарарга, 1387 ыал тырааныспар атыылаһарга, 184 ыал оҕо үөрэнэригэр, 45 ыал — ипотеканы сабарга, 37 — кэтэх хаһаайыстыбаны сайыннарарга, 27 — Арассыыйаҕа сынньанарга, 11 — гааһы киллэрэргэ туһаммыттар.

«100 сыл оҕолоро» хапытаал 2022 сыл кэнниттэн өссө биэс сылга уһаабыта.