1600-тан тахса эдэр чинчийээччи “Инникигэ хардыы” НПК-ҕа бырайыактарын билиһиннэриэхтэрэ

Бүгүн, тохсунньу 9 күнүгэр, Дьокуускайга “Инникигэ хардыы” академик В.П. Ларионов аатынан эдэр  чинчийээччилэр өрөспүүбүлүкэтээҕи билим куонкурус-кэмпириэнсийэлэрин үөрүүлээх аһыллыыта буолла.  

Тэрээһиҥҥэ Ил Дархан Айсен Николаев кыттыыны ылла. Эрэгийиэн научнай кыаҕа сайдыытыгар маннык кэмпириэнсийэлэр олус наадалаахтарын кичэйэн бэлиэтээтэ.

“Кэмпириэнсийэ 29 сыл устата өрөспүүбүлүкэ бастыҥ үөрэнээччилэрин түмэр. СӨ Бастакы Бэрэсидьиэнэ Михаил Николаев өйөбүлүнэн кэмпэриэнсийэ саҥа технологиялары уонна бырайыактары айан-тутан таһаарыыга дьоһун платформа буолла. Быйыл да кэмпириэнсийэ эдэр чинчийээччилэр иннилэригэр саҥа ситиһиилэри дабайарга, инникигэ эрэллээх буоларга киэҥ саҕахтары арыйар”, — диэн бэлиэтээтэ Айсен Николаев.

Быйыл кэмпириэнсийэҕэ 5-11 кылаастарга үөрэнэр 1610 үөрэнээччи кыттар, кинилэр 44 сиэксийэнэн бэйэлэрин бырайыактарын кэпсиэхтиэрэ-билиһиннэриэхтэрэ. Эспиэртиир сүбэҕэ 344 учуонай, преподаватель, аспирант, магистрант үлэлииллэр.

Кэмпириэнсийэ түмүгүнэн кыайыылаахтар уонна призердар Бүтүн Арассыыйатааҕы кэмпириэнсийэлэргэ уонна куонкурустарга кыттарга мэктиэлэниэхтэрэ.

Маны тэҥэ кэмпириэнсийэ чэрчитинэн РНА чилиэн-кэрэспэдьиэнэ, академик Н.Г. Соломонов аатын үйэтитэр сыаллаах аан бастакытын 5-7 кылаас үөрэнээччилэригэр “Юниор” бырайыакка уонна чинчийэр үлэлэргэ өрөспүүбүлүкэтээҕи куонкурус ыытыллыаҕа, диэн иһитиннэрэр Ил Дархан, бырабыыталыстыба пресс-сулууспата.