«Бары уруһуйдуубут» бырайыак Суотту дьонун түмтэ

СӨ Бастакы Бэрэсидьиэнэ М.Е.Николаев «Бары уруһуйдуубут» бырайыага Уус Алдан нэһилиэктэринэн уруһуй эйгэтигэр дьону-сэргэни, ыччаты көҕүлээн ыытылла турар.

Ол курдук, Суоттуга ити хайысханан киэҥ хабааннаах үлэ ыытылынна. «Доҕордоһуу» түмэл тэрээһининэн норуот маастара, уруһуйдьут, Бороҕоннооҕу оҕо ускуустубатын оскуолатын Суоттутааҕы филиалын уһуйааччыта Евдокия Портнягина персональнай быыстапката, үөрэтэр оҕолорун уруһуйдара көрдөрүүгэ туруоруллан, олохтоохтор болҕомтолорун тарта.

Евдокия Яковлевна өрөспүүбүлүкэҕэ, Арассыыйаҕа ыытыллар Аан дойду таһымнаах уруһуй күрэстэригэр бэйэтин уонна үөрэнээччилэрин үлэлэринэн кыттаннар элбэх ситиһиилэрдээхтэр. 2023 с. үс оҕо Санкт Петербурга ыытыллыбыт Бүтүн Арассыыйатааҕы күрэскэ бастакы истиэпэннээх лауреат аатын ылан кэлбиттэрэ.

Евдокия Яковлевна персональнай быыстапката «Үргэл» быыстапкалыыр саалатыгар туруоруллубута. «Арассыыйа — мин историям» историческай пааркаҕа турбут үлэлэрэ Мексикаҕа тиийэ барбыттара. Кини үлэлэрэ төрөөбүт дойдуну хоһуйаллар, биирдиилээн дьон мэтириэттэрэ итэҕэтиилээхтэринэн уратылаахтар.

Суотту орто оскуолатыгар «Бары уруһуйдуубут» бэлиэтэ нэһилиэкпитигэр кэлбитинэн, уруһуй дьоро күнэ тэриллэн талааннаах дьоммутун, үүнэр көлүөнэбитин түмэ тарта. Учууталлар А.Е. Константинова, Р.П. Бубякина үөрэнээччилэрин үлэлэрин бар дьон билиитигэр-көрүүтүгэр таһааран сырдаттылар, уруһуйга бэртээхэй маастар-кылаастары ыыттылар. Суоттуттан төрүттээх биллиилээх дьоммут саха норуодунай худуоһунньуга А.Д. Васильев, саха дьахталларыттан бастакы скульптор Р.Н.Бурцева үлэлэрэ сырдатылыннылар.

Раиса Черкашина,

Суотту, Уус Алдан.

Надежда Федорова хаартыскаларга түһэриитэ.