16,7 тыһыынча оҕоҕо «100 сыл оҕолоро» хапытаалы биэрбиттэр

Саха сиригэр атырдьах ыйыгар 995 оҕо: 506 уол, 489 кыыс төрөөтө. Кинилэр бары Айсен Николаев олохтообут «100 сыл оҕолоро» хапытаалы ылаллар. Хапытаал суумата — 105 тыһыынча солкуобай, Ил Дархан ыйааҕынан өссө 5 сылга уһаан биэрбитэ.

2023 сыл балаҕан ыйын 1 күнүнээҕи туругунан, бу хапытаалы биэрэр туһунан 16 723 быһаарыы ылыллыбыт. Кинилэртэн 6352 ыал 520 мөлүйүөн 900 тыһыынча солкуобай суумалаах хапытаалларын туһаммыттар.

Хапытаал үбүн саамай элбэхтик олорор дьиэни тупсарыыга ыыталлар (380,5 мөлүйүөн солкуобай суумаҕа 4767 сайабылыанньа) уонна тырааныспары атыылаһарга ыыталлар (130,7 мөлүйүөн солкуобай суумаҕа 1459 сайабылыанньа).

40 ыал бааҥҥа оҕо аатыгар кылаат арыйбыттар, 37 ыал кэтэх хаһаайыстыбаны сайыннарыыга, 23 ыал — оҕоҕо үрдүк технологиялаах көмөнү оҥорорго, 15 ыал — оҕо үөрэнэригэр, 11 ыал — дойду иһигэр сынньана барарга ыыппыттар.

2023 сылтан хапытаал үбүн чааһынай дьиэҕэ гааһы киллэриигэ ыытыахха сөп буолла. Гааһы киллэртэрбит уонна анал тэрили атыыласпыт ороскуоту хапытаал үбүнэн толуйтарыахха сөп. 

Ил Дархан, бырабыыталыстыба дьаһалтатын пресс-сулууспата.