17 оскуолаҕа сорох кылаастары саппыттар

Өрөспүүбүлүкэҕэ ааспыт нэдиэлэ түмүгүнэн, 20%-тан тахса оҕо тымныйан (ОРВИ), түөрт уһуйааҥҥа уонна икки оскуолаҕа олоччу, 17 оскуола 53 кылааһыгар итиэннэ 17 уһуйаан 26 бөлөҕөр хааччахтааһын биллэриллибит.  

Өрөспүүбүлүкэтээҕи Роспотребнадзор управлениета иһитиннэрэринэн, бу сыл онус нэдиэлэтигэр суһал кэтээн көрүү түмүгэр, Саха сиригэр 7 943 киһи тымныйбыта, тумуулаабыта (ОРВИ) бэлиэтэммит. Бу, ол иннинээҕи нэдиэлэттэн 10,0% кыра диэн этэллэр.

Анаалыс көрдөрбүтүнэн, гириип вируһунан — 68,6%, негриппознай вируһунан — 28,3%, COVID-19 – 3,2% киһи ыалдьыбыт.

Роспотребнадзор ыарыыга хаптарбат туһугар кэккэ миэрэлэри тутуһуҥ диэн сүбэлиир: илиигитин мыылалаан кичэйэн суунуҥ, ыалдьыбыт дьонтон тэйиччи сылдьыҥ, хоскутун кэмиттэн-кэмигэр салгылатыҥ, элбэх дьон мустар сиригэр сылдьа сатаамаҥ эбэтэр маасканы кэтиҥ, кирдээх илиигитинэн сирэйгитин, хараххытын, муннугутун таарыйымаҥ, чөл олоҕу тутуһуҥ, ыарыы сибикитэ билиннэҕинэ бэйэҕит эмтэнимэҥ, суһаллык бырааска көрдөрүнүҥ.