17-с нүөмэрдээх оскуолаҕа «Дьоруой паартата» баар буолла

Арассыыйа Дьоруойа Дмитрий Егоров сырдык аатын, кини хорсун быһыытын үйэтитэр, ыччакка патриотическай иитиини күүһүрдэр сыалтан, Дьокуускай куорат 17-с нүөмэрдээх оскуолатыгар “Дьоруой паартата” оҥоһуллан турда.

Дьокуускай куорат үөрэҕириитин управлениета иһитиннэрбитинэн,  «Дьоруой паартатын» аһыллыытын үөрүүлээх тэрээһинигэр  Дьоруой огдообото Надежда Андреева кэлэн кыттан, оскуолаҕа махталын биллэрдэ.

Дьоруой тыыннааҕа буоллар, 50 сааһын туолуохтаах этэ. Төрөөбүт Сунтаарыгар бу күннэргэ Дьоруойга аналлаах декада саҕаланна, Владивостокка быыстапка аһыллыахтаах. Оттон бэҕэһээ 17-с нүөмэрдээх оскуолаҕа «Дьоруой паартата» аһылынна.

Тэрээһин кэмигэр Санкт Петербург куораттан  «Образование без границ» үөрэх киинин дириэктэрэ Наталья Полупанова видеосибээһинэн тахсан, оҕолору эҕэрдэлээтэ.