17 улууска элбэх оҕолоох дьиэ кэргэн үөрэнээччилэрэ тырааныспарга босхо айанныахтара

Элбэх оҕолоох дьиэ кэргэн үөрэнээччилэрэ оптуобуска босхо айанныылларыгар өрөспүүбүлүкэ 17 муниципальнай тэриллиитигэр (ол иһигэр, Дьокуускайга) тырааныспарка оскуола каартата олохтоммута.

2025 сыл балаҕан ыйын 1 күнүттэн чэпчэтиилээх айаҥҥа “Саха сирин эдэр олохтооҕо” тырааныспар сыһыарыытын (7-13 саастаах үөрэнээччилэргэ) уонна “Саха сирин олохтооҕо»  каартаны  (14-тэн үөһээ саастаах үөрэнээччилэргэ) туһаныы саҕаланыаҕа.

СӨ Үлэҕэ уонна социальнай сайдыыга министиэристибэтэ иһитиннэрэринэн, уруккуттан үлэлиир оскуола каарталара болдьохторо  бүтүөр диэри, чуолаан 4, 7 уонна 9 кылаастары бүтэриэххэ  диэри, туһаныллаллар. Ол эбэтэр балаҕан ыйын 1 күнүттэн үөрэнээччи туһанар саҥа каартата оҥоһуллубат. Ол оннугар урукку каарталар сыыйа-баайа “Саха сирин эдэр олохтооҕо” эбэтэр “Саха сирин олохтооҕо” каарталарга уларыйыахтара.

Тырааныспарга босхо айанныыр чэпчэтиини ыларга балаҕан ыйын 1 күнүн күүппэккэ, «Алмазэргиэнбанк» офиһыгар тиийэн эбэтэр http://albank.ru/ru/cards/card-order/kids-card сигэҕэ киирэн баан саайтыгар сайаапканы толоруохха сөп.