Айсен Николаев Эдьигээҥҥэ аварийнай-чөлүгэр түһэрэр үлэлэргэ кэккэ соруктары туруорда

Эдьигээн оройуонугар аварийнай-чөлүгэр түһэрэр үлэни ыытыыга Ил Дархан Айсен Николаев ахсынньы 5 күнүгэр киэһэ ыксаллаах быһыыны-майгыны сэрэтэр уонна баһаартан куттала суох буолууну хааччыйар хамыыһыйа мунньаҕар кэккэ соруктары туруорда.

«65 лет Победы» хочуолунай умайбытынан уонна хочуоллар туһаттан тахсыбыттарынан Эдьигээҥҥэ үрдүк бэлэмнээх буолуу эрэсиимэ үлэлиир. Билигин 5 хочуолунай үлэлиир, онтон 2-тэ илии эрэсииминэн, өссө 2 хочуолунай өрөмүөҥҥэ турар. Үлэҕэ 18 киһи тардылынна, олортон  Эдьигээн ОДьКХ  филиалыттан — 10, Ньурбаттан- 8.

Бастакы соругунан Айсен Николаев икки эргэ хочуолунай өрөмүөнүн, олорор дьиэлэринэн нуормаҕа температура эрэсиимин ситиһиллиэхтээҕин ааттаата. Ол кэнниттэн эбийиэктэринэн температура түспэтин туһугар  «илии оттукка» үлэлиир икки хочуолу чөлүгэр түһэриигэ суһаллык үлэлииргэ сорудахтаата.

Суһал дааннайдарынан, өрөмүөҥҥэ  турар икки хочуолунайтан биирдэстэрэ тохсунньу 6 күнүн түүнүгэр 01.00 чааска, иккис хочуолунай күнүс  үлэҕэ киириэхтээх.

Ньурбаттан  чөлүгэр түһэрэр үлэҕэ анаан түүҥҥү рейсинэн саппаас чаастаах биригээдэ тиийбитэ, Дьокуускайтан «Полярные авиалинии»  рейсинэн тэхиниичэскэй таһаҕаһы ыыппыттара. Ону таһынан киин куораттан матырыйаалынай-тэхиниичэскэй мллардаах «Урал» массыына тиийбитэ.

«Бу күннэргэ суһаллык үлэлээбит бары сулууспаларга махтанабын. Бастатан туран, таһаҕаһы, тэхиниичэскэй бородууксуйаны тиэрдибит үлэһиттэргэ, чуолаан, «Полярные авиалинии», ону тэҥэ «Саханефтегазсбыт» үлэһиттэригэр, — диэтэ Ил Дархан.

Үрдүк бэлэмнээх буолуу эрэсиимэ Бэстээх сэлиэнньэтигэр салгыы үлэлиир, онно тохсунньу 1 күнүгэр хочуолунай умайан, чөлүгэр түһэриллэр кыаҕа суох буолбута. Олорор дьиэлэри уотунан итиитигэ көһөрбүттэрэ, онуоха Дьокуускайтан анал тиэхиньикэ ыытыллыбыта. Оскуола-оҕо уһуйаанын сылытыы үлэтэ салҕанан барар. Температура нуормаҕа тиэрдиллибэтинэн, үөрэх икки эбийиэгин быстах кэмҥэ оскуолаҕа  үлэлэтэргэ быһаардылар. Үөрэх министиэристибэтин дааннайынан оҕо уһуйааныгар 13 оҕо сылдьар, ол гынан баран, дьиҥинэн тохсунньу ыйга 7 эрэ оҕо сылдьыахтааҕа билиннэ. Оскуолаҕа 24 оҕо үөрэнэр.

Айсен Николаев Бэстээххэ тутуллар саҥа хочуолунайы түргэнник үлэҕэ киллэрэргэ дьаһайда. Үлэни күн-дьыл туруга сымнаатаҕына салҕаныа. Ол иннинэ сэлиэнньэҕэ наадалаах матырыйааллары тиэрдиэхтэрэ.

Оройуон уонна биэдэмистибэлэр дааннайдарынан,  олохтоохтортон үҥсүү, ол иһигэр мэдиссиинэҕэ көмө оҥорууга көрдөһүү киирбэтэх. Ол да буоллар, өрөспүүбүлүкэ салайааччыта бары эбийиэктэргэ дьуһуурустубаны күүһүрдэргэ сорудахтаата. Кини туспа болҕомтоҕо ас-үөл бородууксуйатынан уонна аһынан-үөлүнэн хааччыйыыга уурда.

Ону таһынан Айсен Николаев суһал сулууспаларга, биэдэмистибэлэргэ уонна тэрилтэлэргэ үрдүк бэлэмнээх буолуу эрэсиимҥэ үлэлииргэ уонна бырааһынньыктар кэннэ эбийиэктэргэ үлэни  күүһүрдэргэ сорудахтаата.

СӨ Ил Дарханын уонна  Бырабыыталыстыбатын пресс-сулууспата