Быйыл Социальнай пуонда Саха сиринээҕи салаата 1804 өрөспүүбүлүкэ олохтооҕун уонна кинилэри арыаллыыр дьону санаторнай-курортнай эмтэниигэ ыытта. Бу сыалга 74 мөлүйүөнтэн тахса солкуобай үп көрүлүннэ. Бу туһунан www.sakha.gov.ru сайт суруйар.
«Маннык көмөнү ылар бырааптаахтар: инбэлииттээх дьон, Аҕа дойду Улуу сэриитин кыттыылаахтара, бойобуой дьайыылар бэтэрээннэрэ, “Блокаднай Ленинград олохтооҕо”, “Төгүрүктээһиҥҥэ түбэспит Севастополь олохтооҕо”, «Төгүрүктээһиҥҥэ түбэспит Сталинград олохтооҕо» бэлиэлэринэн наҕараадаламмыт гражданнар, сэрии инбэлииттэрин өлбүт кэргэттэрэ, Чернобыллааҕы АЭС-ка буолбут саахал содулугар, ону тэҥэ Семипалатинскай полигоҥҥа ядернай боруобалааһын содулугар түбэспит гражданнар уонна кинилэргэ тэҥнээх атын категориялаах дьон», – диэн Социальнай пуонда Саха сиринээҕи салаатыгар иһитиннэрдилэр.
Санаторнай-курортнай путевкалар доруобуйаларын туругунан сөптөөх көрдөрүүлээх гражданнарга уочарат быһыытынан кытаанахтык бэриллэллэр. Социальнай өйөбүл дьаһала нэһилиэнньэ ордук көмүскэлэ суох араҥатын доруобуйатын бөҕөргөтүүгэ уонна олоҕун хаачыстыбатын тупсарыыга туһуланар. Быйыл Социальнай пуонда Саха сиринээҕи салаата оҕолору эмтииргэ анаан 734 путевкаҕа 6 судаарыстыбаннай хантараагы түһэристэ. Бу путевкалар араас ыарыылаах оҕолорго ананаллар.
Путевканы ыларга сайабылыанньаны бу ньымалартан биирдэстэринэн биэриэххэ сөп:
- олорор сиринэн Социальнай пуонда Саха сиринээҕи салаатын килиийиэннэри кытта үлэлиир сулууспатыгар;
- элбэх функциялаах киин нөҥүө;
- судаарыстыбаннай өҥөлөр порталларыгар.
Сайабылыанньаҕа тус дааннайы бигэргэтэр докумуону уонна 070/у форматынан ыспыраапканы ууруллар.