Сэргэх олохтоох Мытаах

Нэһилиэк түөлбэлэрин икки ардыларыгар успуорт  хас да көрүҥэр (теннис, дартс, дуобат) бэрт көхтөөх, сэргэх, сытыы күрэхтэһии буолла.

Бары да ох курдук оҥостон, бэлэмнэнэн, турунан кэлбит буоланнар, күөн күрэскэ эгил-тэгил эристилэр, тилэх үктэһэн олордулар. Түмүккэ 1 миэстэни «Дүөдэ» ылла. Иккис бириистээх миэстэҕэ «Дьөлөккөн» таҕыста. Үсүһү «аартыктар» ыллылар.

Бу күн нэһилиэк баһылыга Иван Петров, түмэл-галерея дириэктэрэ Артур Егоров Дьокуускайга Саха сирин наукаларын академиятын бэрэсидьиэнэ Леонид Владимировы кытта көрсөн элбэх былааннары, соруктары быһаарыстылар.Онтон түмэлбитин ыраах Булуҥтан, Дьокуускайтан, Нам улууһуттан, Бэрдьигэстээхтэн кэлэн сэргээн, сэҥээрэн көрдүлэр-иһиттилэр.

Аны туран, бу күннэргэ Муома улууһуттан ыччаттар 1500 км айаннаан, «Муоматтан эҕэрдэ» диэн кэнсиэрдээх кэлэн Мытаах олохтоохторун улаханнык сэргэхситтилэр. Истиҥ тэрээһиҥҥэ «Тэтим» үҥкүү народнай ансаамбыла, «Халбас харата» көр-күлүү мини-тыйаатыра кытыннылар, дьоро киэһээни сэргэхситэн биэрдилэр.

Маны сэргэ, нэһилиэкпитигэр Кыайыы Знамята кэлиэхтээх. Онно анаан түмэлбитигэр саҥа экспозиция бэлэм буолла.

Онтон олунньу 14-15-18-19 күннэригэр нэһилиэкпитигэр сынньалаҥ киинин иһинэн үлэлиир «Дьиикимдэ дьээбэлэрэ» көр-күлүү народнай мини-тыйаатыра Мытаахха, Бэрдьигэстээххэ, Төҥүлүгэ, Бороҕоҥҥо биирдии кэнсиэри көрдөрүөхтээх, онон айаҥҥа туруналлар.

Саха народнай суруйааччыта Софрон Петрович Данилов кэргэнэ Мария Егоровна төрөөбүтэ 100 сылынан, кыргыттара таһааттарбыт «Данилова Мария Егоровна: о себе, современниках и Софроне Данилове» кинигэ биһирэмэ Дьокуускайга олунньу 21 күнүгэр былааннанар. Бу кинигэҕэ Мытаах нэһилиэгин дьонун ахтыылара киирбиттэрэ. Горнайтан төрүттээхтэр бу тэрээһини истэннэр номнуо сураһаллар, долгуйа күүтэллэр.

Артур Егоров,

Мытаах, Горнай.

Ааптар хаартыскалара.