Дьокуускайдааҕы «Василек» уһуйаан 45 cыллаах үбүлүөйүн бэлиэтиир

Дьокуускай куорат 19-c №-дээх «Василек» уһуйаан 45 cыллаах үбүлүөйүн бэлиэтиир. Уһуйаан 1978 сыллаахха ахсынньы аам-даам тымныытыгар үлэтин саҕалаабыта. Оччолорго уһуйаан «Геолог» диэн ааттааҕа. Тоҕо диэтэххэ, геологоразведочнай структураҕа киирсэрэ.  Уһуйаан бастакы сэбиэдиссэйинэн Ида Сергеевна Ляпунова этэ.

1992 сыллаахха уһуйаан Дьокуускай куорат үөрэҕин управлениетыгар бэриллибитэ. Ол сыллартан уһуйаан оҕону иитиигэ үгүс элбэх үлэни-хамнаһы, элбэх көлүөнэни үүннэрэн таһаарда. 2010 сыллаахха уһуйаа оҕо сайдыытын киинин аатын ылбыта уонна оҕону иитиигэ куорат биир экспериментальнай былаһааккатынан  буолбута. Бу уһуйааҥҥа иитээччи буолуон бааҕалаах устудьуон оҕолор быраактыкаларын ааһаллар. Уопуттаах иитээччилэр кынаттарын аннынан үгүс оҕо үөрэх кыһатын бүтэрэн үлэлии барбыттара.

Ааспыт сылтан уһуйааны Евгения Леонидовна Духанина диэн эдэр үлэһит салайар. Билигин уһуйааҥҥа 1.5-7 cаастарыгар диэри 250 кэриҥэ оҕо сылдьар. Уһуйаан аҕыс бөлөххө арахсан үлэлиир. Уһуйааҥҥа оҕолорго сахалыы бөлөх баар. Төрүт итэҕэли үөрэтиигэ туһуланар. Уһуйаан оҕолоро куоракка, өрөспүүбүлүкэҕэ ыытыллар бары куонкурустарга көхтөөхтүк кытталлар.

Билигин кэллэктиип 56 үлэһиттээх. Балар истэригэр Дьокуускайдааҕы педагогическай кэллиэһи бүтэрбит эдэр иитээччилэр бааллар уонна 30 тахса сыл үлэлээбит уопуттаах үлэһиттэр.