19 саастаах эдэр киһи тулаайах кыыһы албыннаан харчытын уорбут

Бүлүү улууһугар полиция үлэһиттэрэ тулаайах кыыстан мөлүйүөн аҥаарыттан тахса сууманы уорбут уорбаланааччыны быһаарбыттар.

Бүлүү улууһун ИДьМ дьуһуурунай чааһыгар тулаайах кыыс кэлэн счеппуттан социальнай төлөбүртэн мунньубут 550 тыһ. солк. уорбуттар диэн сайабылыанньа суруйбут.

Суһал-көрдүүр үлэ түмүгэр холуобунай көрдөөччүлэр уорбаланааччыны быһаарбыттар. Бу 19 саастаах үлэтэ суох, үҥсээччи доҕоро киһи эбит.

Барыллаан быһаарбыттарынан, уорбаланааччы эрдэ харчы кэлбитин ылабын диэн куоһурданан, кыыс кини төлөпүөнүгэр мобильнай баанын холботторбут. Кыыс кини этэрин толорбут уонна бэйэтин аккаунуттан тахсарын умнан кэбиспит. Маны бэлиэтии көрөн, эдэр киһи кыыс социальнай төлөбүртэн мунньуммут улахан суумалаах уурунуу харчылааҕын билэр буолан мобильнай баан нөҥүө 550 тыһ. солк. тахса сууманы уорбут. Буруйу оҥорооччу этэринэн, харчыны барытын онлайн-казиноҕа сүүйтэрбит.

РФ Холуобунай кодекс 158 ыст. 3 ч. “Уоруу” холуобунай дьыала тэриллибит. Бу туһунан СӨ ИДьМ пресс-сулууспата иһитиннэрэр.