19 сыл буолан баран киһини өлөрбүттэрэ биллибит

19 сыллааҕыта Уус-Ньара 29 саастаах олохтооҕо сураҕа суох сүппүтэ. Быйыл маныаха уорбаланан, 39 уонна 40 саастаах эр дьон тутулуннулар. Оччолорго кинилэр 20 уонна 21 саастаах этилэр диэн СӨ ИДьМ пресс-сулууспата иһитиннэрэр.

Быһылаан 2006 сыл күһүнүгэр буолбут. Ийэтэ уолун сүтүктээн полицияларга сайабылыанньа суруйбут. Кини балаҕан ыйын 30 күнүгэр полицияҕа кэлбит, оттон ол күн иннинэ ГАИ үлэһиттэрэ ДОСААФ территориятыттан умайбыт массыынатын булбуттара. Онон өлөрүү диэн ыстатыйанан холуобунай дьыала тэриллибитэ. Ол эрээри, быйылга диэри бу дьыала сатаан арыллыбатах.

«2025 сылга ИДьМ-ҥа 40 саастаах эр киһи бу дьыалаҕа сыһыаннаах буолуон сөбүн туһунан информация киирэр», — диэн пресс-сулууспа иһитиннэриитигэр суруллар.

Саҥа дааннайдар дьыала хамсыырыгар көмөлөһөллөр. Сибэдиэтэллэри көрдөөн, полицейскайдар хас даҕаны эрэгийиэҥҥэ сылдьаллар. Командировкалар үтүө түмүктэри аҕалаллар, быраабы араҥаччылааччылар 40 саастаах уорбаланааччыны булаллар. Онон кинини Кемеровскай уобалас Междуреченскай куоратыттан тутан, Саха сиригэр аҕалаллар.

Тутуллан баран, бу хаста да сууттана сылдьыбыт эр киһи 19 сыллааҕыта өссө икки билэр киһитин кытта киһини өлөрбүттэрин туһунан билинэр. Иккис уорбаланааччы 39 саастаах, билигин даҕаны Уус-Ньараҕа олорор эбит. Кинини эмиэ туппуттар. Үһүс киһилэрэ оччолорго 18 саастаах, хас да сыллааҕыта өлбүт.

Туох буолбутай?

2006 сыллаахха үс эдэр киһиттэн турар хампаанньа кафеҕа олорбут. Онно 29 саастаах эр киһи киирэр. Бу киһини кытта эрдэттэн кинилэр сыһыаннара соччото суох эбит. Тута иирсэн турбуттар, салгыы быһаарса айанаабыттар. Уолаттар бу киһини өлөрөрдүү былааннаан томторго ыҥырбыттар. Анараа киһи улахаҥҥа уурбатах буолан, улгумнук сөбүлэспитэ буолуо диэн ИДьМ бэлиэтээн суруйар.

Бары бу киһи массыынатыгар олорон томторго тиийбиттэр. Онно өссө массыына иһигэр 18 саастаах уол кэлин олбоххо олорон, киниэхэ саба түспүт, хабарҕалаан саҕалаабыт. 21 саастаах киһи суоппары өйүн сүтэриэр диэри иккитэ сыҥаахха саайбыт. Салгыы үһүөн бу киһини массынаттан таһааран баран тэбиэлээбиттэр. Өссө массыынанан хаста даҕаны үрдүнэн айаннаабыттар. Уруулга хампаанньа саамай эдэр киһитэ олорбут.

Киһини өлөрөн бараннар, Индигиир өрүскэ муостаҕа кэлбиттэр. Өлүккэ ыйааһын оҥорон тугу эрэ баайбыттар уонна ууга бырахпыттар. Массыынаттан тарбахтарын суолларын кистээри, уоттаабыттар.

Икки тутуллубут киһи РФ ХК 105 ыст. 2 ч. (убийство, совершенное группой лиц по предварительному сговору) буруйдаммыттар. Итиэннэ 39 саастаах киһи массыынатыттан конструктивнай чаастара уларыйбыт сааны булбуттар. Бу манан эмиэ холуобунай дьыала тэриллибит.