Бүтүн Арассыыйатааҕы Олимпиадаҕа куттала суох буолуу дьаһалларын күүһүрдүөхтэрэ

Биэдэмистибэлэр уонна тэрилтэлэр икки ардыларыгар оробуочай сүбэ мунньахха СӨ Бырабыыталыстыбатын Бэрэссэдээтэлэ Кирилл Бычков успуорт эбийиэктэригэр куттала суох буолуу дьаһалларын күүһүрдэргэ кэккэ сорудахтары биэрдэ.

Дьокуускай куоракка үөрэнээччилэргэ Бүтүн Арассыыйатааҕы Олимпиада түмүктүүр түһүмэҕэ «Физическая культура» биридимэтинэн муус устар 12-18 күннэригэр  ыытыллыаҕа. РФ 89 субъегыттан 300-кэ үөрэнээччи кытталлара күүтүллэр.

«Бүтүн Арассыыйатааҕы Олимпиада – элбэх киһи кыттыан сабаҕаланар улахан суолталаах түгэн. Онон биһиэхэ улахан эппиэтинэһи сүктэрэр. Манна даҕатан эттэххэ, «Азия оҕолоро» норуоттар икки ардыларынааҕы успуорт оонньуулара курдук улахан тэрээһиннэри ыытыыга уопуттаахпыт. Маны учуоттаан, тэрээһин саамай үрдүк таһымҥа ыытыллыахтаах», — диэн премьер- миниистир бэлиэтээтэ.

Кирилл Бычков тустаах сорудахтары ас-үөл, трансферы хааччыйыы боппуруостарыгар биэрдэ. Турнир эрэгийиэннээҕи түһүмэҕэ физкултуураҕа икки түһүмэхтэн турар: теоретическай уонна практическай.
Сиһилии манна аах.