1956 сыл. Саха учуутала «Огонек» сурунаалга

Сэбиэскэй кэмҥэ хас даҕаны мөлүйүөн тираһынан тахсар «Огонёк» сурунаалы дойду үгүс олохтоохторо сурутан ааҕаллара.  Нэдиэлэ ахсын уопсастыбаннай-бэлитиичэскэй уонна  литературнай-художественнай сурунаалга үгүс интэриэһинэй суруйуулар, өҥнөөх хаартыскалар бэчээттэнэллэрэ.

Сурунаал бастакы нүөмэрэ 1923 сыллаахха тахсыбыта. 1956 сыл 4-с нүөмэрин бастакы сирэйигэр Саха АССР Орджоникидзевскай оройуонун Хачыкаат сэлиэнньэтин учуутала Анна Павловна Сивцева уруок ыыта турар хаартыската бэчээттэммитэ. Бу фотограф Я. Рюмкин түһэриитэ этэ.

Эмиэ бу нүөмэргэ Москваҕа ыытыллыбыт Бүтүн Сойуустааҕы эдэр суруйааччылар сүбэ мунньахтарыттан «Совещание молодых писателей» диэн тэттик ыстатыйа тахсыбыта. Манна бэйиэт Моисей Ефимов хаартыскатын көрүөххэ сөп.