Бөтүҥ нэһилиэгэр «Байанай күрэҕэ» ыытылынна

Бу өрөбүллэргэ Улуу Кыайыы 80 сылын чэрчитинэн Нам улууһун Бөтүҥ нэһилиэгин кадровай бэтэрээн булчуттарын ааттарынан улуустааҕы «Байанай күрэҕэ – 2025» бэрт сэргэхтик буолан ааста. Бу туһунан Бөтүҥ нэһилиэгин дьаһалтатын пресс-сулууспата суруйар.

Күрэххэ уопсайа 8 хамаанда кытынна: Үөдэй, 1-Хомустаах, Партизан, Хамаҕатта, Таастаах, Модут, Бөтүҥ нэһилиэктэрэ. Күрэх бастакы күнүгэр Дьокуускай куоракка туоһапканан, буулдьанан, харабыынынан ытыылар уонна спортинг күрэхтэрэ буоллулар. Күрэх түһүмэхтэринэн кыайыылаахтар маннык быһаарылыннылар:

Туоһапканан ытыы: бастакы миэстэ — Бөтүҥ «Сонор», иккиэс миэстэ — 1-Хомустаах , үһүс миэстэ —  Партизан.

Буулдьанан ытыы: бастакы миэстэ — Хамаҕатта, иккиэс миэстэ — Модут, үһүс миэстэ — Бөтүҥ «Сонор».

Харабыынынан ытыы: бастакы миэстэ —  Бөтүҥ, иккиэс миэстэ — Үөдэй, үһүс миэстэ — Бөтүҥ «Сонор».

Спортинг: бастакы миэстэ — Модут, иккиэс миэстэ — 1-Хомустаах, үһүс миэстэ — Бөтүҥ «Сонор».

Күрэх иккис күнүгэр аптамаат сааны ыһыы-таҥыы, ойбон алларыыта, кутаа уоту оттуу, тургутукка хоруйдааһын уонна эстафета ыытылынна. Тэрээһин үөрүүлээх аһыллыытыгар хамаандалар парадтаан киирдилэр. Сахалыы сиэринэн алгысчыт аал уоту оттон Айыылартан көрдөстүлэр. Улуус дьаһалтатын дьыалаларыгар дьаһайааччы Петр Сергучев, Бөтүҥ нэһилиэгин баһылыга Михаил Макаров, Намнааҕы судаарыстыбаннай, экологическай надзор иниспиэктэрэ Семен Эверстов тыл эттилэр уонна кылаабынай судьуйа Иван Яковлев күрэх балаһыанньатын хамаандаларга билиһиннэрдэ, ситиһиилэри баҕарда.

Маны сэргэ тулалыыр эйгэҕэ харыстабыллаахтык сыһыаннаһыыга тарҕатар үлэҕэ уонна бөрө ахсаанын бэрээдэктээһин үлэтигэр тус кылааттарын иһин «Бобуулаах сирдэри кытта дьыала сайдыытыгар кылаатын иһин» түөскэ кэтиллэр бөрөһүт-булчуттар  Петр Слепцов уонна Петр Кириллин наҕараадаланнылар. Ону сэргэ үлэ бэтэрээнэн, СӨ Тыатын хаһаайыстыбатын туйгуна Степан Куличкин, Нам улууһун баһылыга Юрий Слепцов бочуоттаах грамотатын тутта. Байанай күрэҕин иккис күнүгэр күрэх 5 түһүмэҕинэн ыытылынна:

Тургутукка хоруйдааһын: бастакы миэстэ — Бөтүҥ «Сонор», иккиэс миэстэ —  1-Хомустаах, үһүс миэстэ — Үөдэй.

Аптамаат сааны ыһыы-таҥыы : бастакы миэстэ — Таастаах, иккиэс миэстэ —  1-Хомустаах, үһүс миэстэ — Бөтүҥ «Сонор».

Ойбон алларыыта : бастакы миэстэ -1-Хомустаах, иккиэс миэстэ —  Хамаҕатта, үһүс миэстэ — Үөдэй.

Кутаа уоту оттуу: бастакы миэстэ — 1-Хомустаах, иккиэс миэстэ —  Үөдэй , үһүс миэстэ — Модут.

Эстафета: бастакы миэстэ — Модут, иккиэс миэстэ — Үөдэй, үһүс миэстэ — 1-Хомустаах.

Уопсай хамаанданан түмүккэ бастакы миэстэҕэ 1-Хомустаах хамаандата таҕыста уонна хас биирдии кыттааччы Бөтүҥ нэһилиэгин Япония сэриитин бэтэрээнин, Саха АССР үтүөлээх булчутун Макаров Михаил Васильевич аатыттан оҕолоро, кийииттэрэ уонна сиэннэрэ туруорбут уу харчынан 10 тыһ. солк. наҕараадаланнылар.

Иккис бочуоттаах миэстэни Бөтүҥ «Сонор» хамаандата ылла уонна Намнааҕы ГИМС тэрилтэтигэр эҥкилэ суох үлэлээбит Егор Васильевич Никонов бииргэ үөрэммит кылааһынньыктара, доҕотторо туруорбут бириистэринэн наҕараадаланна. Үһүс миэстэни Модут хамаандата ылан, улуус дьаһалтата туруорбут 400 лиитэрэ уматык сэртипикээтин тутта.

Биирдиилээн көрүҥнэргэ Бөтүҥ нэһилиэгин кадровай булчуттарын ааттарынан хас биирдии көрүҥҥэ бастакы миэстэ кыайыылаахтарыгар 5 тыһ. солк., иккистэргэ — 3 тыһ. солк. уонна үһүстэргэ — 2 тыһ. солк. уу харчынан наҕараадаланнылар.