2 мөл. солк. суумалаах маркировката суох табаҕы харайа сылдьыбыттара биллибит

Ааспыт сууккаҕа өрөспүүбүлүкэҕэ аҕыс буруйу оҥоруу бэлиэтэннэ диэн СӨ дьуһуурунай борокуруора иһитиннэрэр.

Дьокуускайга, Нерюнгрига уонна Мииринэйгэ түөкүннээһин туһунан иһитиннэриилэр киирбиттэр. Түөкүттэр дьонтон 11,4 мөл. солк. сууманы суйдаабыттар. Ол иһигэр Айхал бөһүөлэгин олохтооҕо «инвестицияҕа» угабын дии санаан, 7,3 мөл.солк. тахса харчытын албыннаппыт.

Өрөспүүбүлүкэ киин куоратыгар бэлисипиэт уоруллубут, арыгы иһэн баран иккистээн уруулга олорбут киһини туппуттар, 2 мөл. солк. тахса суумалаах маркировката суох табах бородууксуйатын харайа сылдьыбыттара биллибит.

Киһи өлүүлээх суол быһылаана бэлиэтэммэтэх.

Суукка иһигэр итирик туруктаах 18 суоппары туппуттар.