20 саастаах кыыс наушнигы уоран дьыалаҕа эрилиннэ

Биир эдэр дьахтар атыы-эргиэн киинигэр кэлин  аанынан киирэн, үлэһит тус малын-салын уоран тутулунна. Бу туһунан   ИДьМ Дьокуускайдааҕы управлениетын пресс-сулууспата  иһитиннэрдэ.  

2-с нүөмэрдээх полиция отделын дьуһуурунай чааһыгар  урбаанньыттан сайабылыанньа киирбит.  Ол курдук, кимэ биллибэт киһи үлэһит тус малын уорбут.

Суһал-ирдиир үлэ кэмигэр холуобунай ирдэбил үлэһиттэрэ уорбаланааччыны —  урут сууттана сылдьыбыт 20 саастаах олохтоох кыыһы туппуттар.

Быһаарыллыбытынан, уорбаланааччы атыы-эргиэн киинэ аһылла илигинэ, кэлин аана аһаҕас турарын бэлиэтии көрбүт. Итиэннэ иһигэр киирэн биир атыылыыр сиргэ дьоҕус  остуолга наушник сытарын уоран ылбыт.  Эдэр дьахтар маҕаһыынтан тахсан баран наушнигы төлөпүөнүгэр холбуу сатаабыт да, онтута кыаллыбатах. Инньэ гынан быраҕан кэбиспит.

Билигин уорбаланааччыга РФ Холуобунай кодексын 158 ыст. 1 ч. холуобунай дьыала көбүтүллүбүт.