200 сыллааҕыта Дьокуускайга хас киһи олорор этэй?

Киин куорат күнүн көрсө, Дьокуускай устуоруйатын түмэлэ интэриэһинэй чахчылары таһаарар. 200 сыллааҕыта Дьокуускай куоракка 2458 киһи олорор эбит. Ол иһигэр: 1528 эр киһи, 930 дьахтар. 29 атыыһыт баара бэлиэтэммит. 

Куорат улахан тутуулара: 2 таас дьиэ, 281 мас дьиэ, 6 таҥара дьиэтэ, 1 манастыыр, 1 үөрэх кыһата, 5 «богоугоднай» дьиэ, 5 собуот, фабрика, 9 арыгы иһэр дьиэ, 1 көстүүнэй.

Бу чахчылар «Статистические изображения городов и посадов Российской империи по 1825 год» докумуоҥҥа бааллар. 19-с үйэҕэ диэри Арассыыйаҕа нэһилиэнньэ туһунан дааннайдары «ревизии» диэн ааттаах «дууһанан» биэрэпис түмүгүнэн, ааҕаллара. Маннык ревизия уончата ыытыллыбыта (1718-1856 сс.).

Бу ревизиялар элбэх итэҕэстээх этилэр: нэһилиэнньэни бүтүннүүтүн хаппаттара. Холобур, бастакы, иккис, алтыс ревизияларга дьахталлары учуоттаабатахтара, бэлитиикэҕэ бас-көс дьон эмиэ ааҕыллыбат этилэр.

Бастакы киэҥ хабыылаах статистическай учуот 19-с үйэ бастакы чиэппэригэр ыытыллыбыта. Бу учуоту 1810 сыллаахха тэриллибит Ис дьыала министиэристибэтин иһинэн тэриллибит Статистическай отделение ыыппыта. Бу биэрэпис түмүгүн ырытан, 1829 сыллаахха таһаарбыттара.