200 тыһ. көмө харчы 90 % төлөннө, аны байыаннай госпиталга диэри айан суола толуйуллуо

Өрөспүүбүлүкэҕэ анал байыаннай эпэрээссийэҕэ сылдьааччылар дьиэ кэргэттэрин социальнай өттүнэн өйөөһүн тиһиктээхтик барар.

Бүгүҥҥү туругунан быстах хомуурга мобилизацияламмыт, баҕа өттүлэринэн барбыт уонна хантараагынан сылдьааччы дьон дьиэ кэргэттэрэ Ил Дархан Айсен Николаев ыйааҕынан бигэргэммит 200 тыһ. солк. социальнай көмөнү 90 % ыллылар. Ол туһунан Бырабыыталыстыба бэрэссэдээтэлин солбуйааччы Ольга Балабкина иһитиннэрдэ.
Ольга Балабкина быһаарбытынан, сибидиэнньэлэрэ бигэргэммэтэх уонна чугас аймахтара, дьиэ кэргэттэрэ сайабылыанньа суруйбатах дьон төлөбүрдэрэ эрэ хаалбыт. Инньэ гынан байыаннайдарга төлөбүрү бэйэлэригэр ыытар курдук докумуоннары хомуйуу, бэрэбиэркэлээһин үлэтэ барар.
Брифиҥҥэ этиллибитинэн, ааспыт нэдиэлэҕэ «122» быһа линия нөҥүө нэһилиэнньэ байыаннай эпэрээссийэҕэ сылдьар дьоҥҥо оҥоһуллар социальнай төлөбүрдэр тустарынан ыйытыыта аҕыйаабыт.
«Саха Өрөспүүбүлүкэтигэр олохтоммут бэрээдэк чэрчитинэн, эчэйиини ылбыт байыастарга аймахтара байыаннай госпиталга тиийэр айаннарын суолун төлөбүрүн тиийинэн олоруу алын кээмэйин иккигэ төгүллэммит сууматынан олохтоон көмөлөһөргө бэлэммит. Ол быһа холоон, 41-тэн 49 тыһ. солк. тиийиэ», – диэн Ольга Балабкина иһитиннэрдэ.
Итини таһынан, өрөспүүбүлүкэ Аҕа Баһылыга Айсен Николаев Бырабыыталыстыбаҕа тулаайах быһыытынан билиниллибит байыаннай сулууспалаахтар балтыларын, бырааттарын анал социальнай истипиэндьийэни ылааччылар категорияларыгар киллэрэргэ сорудахтаабытын бэлиэтээтэ.