2022 сылга өрөспүүбүлүкэ бүддьүөтүгэр «Якутуголь» хампаанньаттан үп киириитэ 23 % үрдээбит

2022 сылга өрөспүүбүлүкэ бүддьүөтүгэр «Якутуголь» хампаанньаттан үп киириитэ 23 % үрдээбит. Ил Дархан Айсен Николаев «Якутуголь» акционернай хампааанньа ааспыт уонна  саҥа үүммүт сылга финансовай-хаһаайыстыбаннай үлэтин былаанын көрдө. Дойду үрдүнэн  сир баайын хостооччуларга төһө да уустук  кэмин иһин, хампаанньа туруоруммут соругун ааспыт сылга ситиспитин туһунан Айсен Николаев бэлиэтээтэ.

«Нерюнгри оройуонун, ону сэргэ Нерюнгри куоратыгар баар эрэгийиэммит биир улахан суолталаах бырамыысыланнай тэрилтэтэ инникитин даҕаны былааннарын этэҥҥэ толорон үлэлиэҕэ, олохтоох каадырдары үлэҕэ угуйуоҕа диэн эрэнэбит«, — диэн Ил Дархан эттэ.

Таас чоҕу хостооһунунан дьарыктанар «Якутуголь» хампаанньа салайар дириэктэрэ Сергей Коломников үлэ түмүгүн уонна инники былааннары иһитиннэрдэ. Ол курдук, 2022 сылга оҥорон таһаарыыны элбэтии уонна саҥа оробуочай миэстэлэри таһаарыы  түмүгэр өрөспүүбүлүкэ бүддьүөтүгэр  «Якутуголь» хампаанньа нолуокка ааһар үбэ икки төгүл үрдээбит. Ол түмүгэр өрөспүүбүлүкэ бүддьүөтэ 23% үрдээбит. Ааспыт сылга хампаанньа 4 мөлүйүөн туонна таас чоҕу хостообута. Хампааннаьаҕа саҥа тиэхиньикэлэринэн хааччыллыы инвестиционнай бырагыраама чэрчитинэн салгыы барар.

«Биһиги оҥорон таһаарыыны улаатыннардыбыт уонна үүммүт 2023 сылга саҥа соруктары туруорабыт. Бастатан туран хайаны байытыы кыамтатыгар сыһыаннаах буолуоҕа. Ону сэргэ хайаҕа (вскрышные) аһаҕас үлэлэри былырыыҥҥытааҕар икки төгүл элбээтиннэрэр санаалаахпыт. 2023 сылга уонна инникитин даҕаны «Нерюнгринскай» таас чоҕу хостуур сиригэр 6 экскаваторы, 4 буровой установканы, 123-220 туоннаҕа тиийэ таһаҕас тиэйэр 18 массыынаны ылар санаалаахпыт. «Дьабарыкы Хайа» таас чох хостуур сиригэр 35-55 туоннаҕа тиийэ таһаҕас тиэйэр үс массыынаны ылыахпыт», — диэн Сергей Коломников иһитиннэрдэ. Ол курдук үүммүт сылга «Якутуголь» тэрилтэ уопсайа 35 араас көрүҥ тиэхиньикэни ылара былааннанар.

«Тастан киириини солбуйар бырагыраама чэрчитинэн, барыта бэйэбит дойдубут оҥорон таһаарбыт тиэхиньикэтэ атыылаһыллыахтаах, —  диир дириэктэр. —  Маны таһынан, «Нерюнгринскай» диэн хайа-байытар фабрика отстойнигыттан шламтан оҥорон таһаарар комплекс тутуллан саҕаланна. Тутуу 2023 сыл ахсынньытыгар үлэҕэ киириэҕэ. Бу инвестиционнай бырайыак эбии үлэ миэстэтин таһаарыаҕа уонна тэрилтэ серьевой баазатын 3 мөлүйүөн туонна чоҕунан элбэтиэҕэ».

Мунньахха «Олохтоох каадыры бырамыысыланнаска»  диэн «Якутуголь» хампаанньа 2018 сылтан кыттар уопута ситиһиилээҕэ бэлиэтэннэ. Ол курдук, үлэһит илии 87 % -на олохтоох дьон буолаллара биллэр. Ааспыт сылга тэрилтэҕэ 600 олохтоох киһи үлэҕэ киирбитэ. Бүгүҥҥү күҥҥэ хампаааньаҕа эбии 400 киһини үлэҕэ ыҥыраллар. Ааспыт сыл ахсынньытыгар тэрилтэ Саха сирин нэһилиэнньэ дьарыктаах буолуутун хааччыйар судаарыстыбаннай кэмитиэти кытта сөбүлэҥ түһэрсибит. Ол сөбүлэҥинэн олохтоох каадыры үлэнэн хааччыйыы бырайыага ыытыллар.

«Якутуголь » хампаанньаҕа билигин 2788 киһи үлэлиир. Инвестиционнай бырагыраамма чэрчитинэн быйыл үлэһит илии ахсаана 3500-кэ тиийэ элбиэҕэ. 2023 сылга хампаанньа 4,2 мөлүйүөн туонна таас чоҕу хостуурга былааннаабыт. Бу — эһиилги сылга таас чоҕу хостооһуну 6 мөлүйүөн туоннаҕа тиийэ элбэтэргэ кыах биэриэҕэ.

Хампаанньа сыллааҕы үлэтин түмүгүн көрөн баран, Ил Дархан Айсен Николаев таас чоҕу хостооһунунан дьарыктанар тэрилтэҕэ «Дьабарыкы Хайа» чох хостуур сиригэр уһун кэмнээх былааны оҥорорго сорук туруорда, ону сэргэ Нерюнгри оройуона социальнай-экэниэмиичэскэй өттүнэн сайдарыгар төһүү күүс буоларга сорудахтаата.

«Якутуголь» Арассыыйаҕа таас чоҕу хостуур биир тарбахха баттанар улахан хампаанньа «Мечел» бөлҕөр киирэр. Кини састаабыгар «Нерюнгринскай», «Кангаласскай», «Дьабаракы Хайа», ону сэргэ Нерюнгритааҕы хайа-байытар фабрика бааллар. «Якутуголь» хампаанньа бородууксуйата ис да, тас да ырыынкакка киэҥник биллэр. Кытайга, Японияҕа, Соҕуруу Кэриэйэҕэ онтон да атын дойдуларга тахсар.