2022 сылга гуманитарнай көмө 40 авиарейсынан ыытыллыбыт

Бу туһунан “Саха сирэ эйигин кытары!” өрөспүүбүлүкэтээҕи уопсастыбаннай хамсааһын ыстаабын салайааччы Айыл Дьулурҕа иһитиннэрдэ. Ону тэҥэ, байыаннай чаастарга сиринэн уонунан туонна таһаҕас тиэрдиллибит.

Көмөнү тэрилтэлэр, улуустар, нэһилиэктэр дьаһалталара, биирдиилээн дьон ыыталлар. 600-тэн тахса киһи ыстаапка кэлэн, 100-кэ киһи иистэнэр сыахха үлэлээтилэр. Хас да тыһыынча киһи улуустарга быстах хомуурга ыҥырыллыбыт дьон дьиэ кэргэттэригэр көмөлөстүлэр.

— Дмитрий Садовников салалталаах өрөспүүбүлүкэтээҕи ыстаап таһаҕаһы тиэрдии хайысхатынан чуолкайдык үлэлээтэ. Биһиги билигин байыаннай дьайыыга сылдьар уолаттартан да, кинилэр төрөппүттэриттэн элбэх махтал тылларын тутабыт. Волонтердарбыт хоруопкалары, кууллары тутан турар саллааттары көрдөхтөрүнэ, наһаа үөрэллэр. Биһиги көмөбүт уолаттарга быһаччы тиийэр, — диэн кини эттэ.

“Саха сирэ эйигин кытары!” өрөспүүбүлүкэтээҕи уопсастыбаннай хамсааһын гуманитарнай көмөнү хомуйар пууна үлэтин салгыыр. Уһун өрөбүллэргэ тохсунньу 5-6 күннэригэр үлэлииллэр. Аадырыстара: Дьокуускай к., Орджоникидзе уул., 10 №-рэ. Сарсыарда 10 чаастан киэһэ 7 чааска диэри.