Ааспыт сыл чулуу дьоно кимнээҕий?

Вячеслав Дьяконов – “Дыгын оонньууларын” кыайыылааҕа

Саха дьоно-сэргэтэ сайын ахсын биир саамай сэҥээрэр уонна кэтэһэр тэрээһининэн  успуорт төрүт көрүҥнэригэр “Дыгын оонньуулара” күрэхтэһии буолар. Ол курдук, Туймаада ыһыаҕын кэмигэр Үс Хатыҥ түһүлгэтигэр 13 мадьыны үгэс буолбут сэттэ көрүҥҥэ күрэхтэспиттэрэ: «Үс төгүл үс», «Тутум эр­­гиир», мас-рестлинг, оҕунан ытыы, 400 миэтэрэҕэ сүүрүү, хапсаҕай уонна тааһы көтөҕүү.

Икки күннээх күөн көрсүү түмүгүнэн быйылгы кыайыылааҕынан Нам улууһуттан сылдьар Вячеслав Дьяконов буолла. Вячеслав баара-суоҕа 22 саастаах, ХИФУ физкултуура уонна успуорт институтун 1 кууруһун устудьуона, Николай Дьяконов уола. Кини “Дыгын оонньууларыгар” төрдүс сырыытын кыттан өрөгөйдөөх кыайыыны ситистэ.

Сардааналаах Айаал – Азия Олимпиадатын призердара

Балаҕан ыйын бүтүүтэ Кытай Ханчжоу куоратыгар буолбут Азиатскай континент атлеттарын икки ардыларынааҕы күрэхтэһиигэ буолбута Саха сириттэн сылдьар марафонец Сардаана Трофимова уонна тустуук Айаал Лазарев мэтээл иһин киирсибиттэрэ.

Сардаана Трофимова марафоҥҥа 2 чаас 28 мүнүүтэ 39 сөкүүндэ көрдөрүүлээх биэтэккэ үһүс кэлэн, бар дьону үөрдүбүтэ. Оттон көҥүл тустууга 125 киилэҕэ диэри ыйааһыҥҥа Айаал Лазарев кыттан, боруонса мэтээли ылары ситиспитэ.

Арбугаевтар  – “Оскар” бириэмийэ номинаннара

Саха сирин режиссердара Максим уонна Евгения Арбугаевтар «Выход» диэн киинэлэрэ «Оскар» бириэмийэҕэ бэлиэтэммитэ. Арбугаевтар киинэлэрэ «Лучший короткометражный документальный фильм» диэн номинацияҕа күрэхтэһэн, биэс бастыҥ киинэ иһигэр киирбитэ. Бу номинацияҕа бастыҥнары киинэ академиятын 930 чилиэнэ көрбүтэ-истибитэ.

«Бу саха кинематографиятыгар улахан ситиһиинэн буолар. Максим уонна Евгения Арбугаевтар саха киинэтэ үгүһү сити­һиэн сөбүн дакаастаатылар», – диэн Ил Дархан Айсен Николаев бэлиэтээн эппитэ.

Мөлүйүөннээх кыыс

Сайын бүтүн өрөспүүбүлүкэ ус­­туоруйатыгар кэрэ-бэлиэ күн буол­бута. 2023 сыл бэс ыйын 23 күнүгэр Саха сирин мөлүйүөн ахсааннаах олохтооҕо Мииринэй куоракка олорор Арина, Гаврил Онуфриевтар дьиэ кэргэттэригэр иккис оҕонон күн сирин көрбүтэ.

Ийэ 40 нэдиэлэтин 2 күн аһардан, бэйэтэ кылбардык төрөөбүтэ. Кыыс ыйааһына 4200 г, үрдүгэ
56 см этэ.

Онуфриевтар иккиэн “АЛРОСА” хампаанньаҕа үлэлииллэр. Арина Орто Халыматтан төрүттээх, “Якутнипроалмаз” бырайыактыыр институтугар үлэлиир. Гаврил Бүлүү Хампатыттан төрүттээх. “АЛРОСА” алмааһы наардыыр киинигэр үлэлиир.

Евгений Кривошапкин Эверест хайаны дабайда

Саха сириттэн уонна сахалартан бастакы киһи Сир ийэ муҥутуур үрдүк чыпчаалыгар таҕыста. Ыам ыйын 15 күнүгэр Өймөкөөнтөн сылдьар, кадастр инженерэ идэлээх Евгений Кривошапкин 8848 үрдүктээх Эверест хайатын даба­йан, уһук чыпчаалыгар ытынна, былыттары аллараа хаалларан, Саха Өрөспүүбүлүкэтин былааҕын күөрэччи көтөхтө!

Евгений иллэҥ кэмэр гид быһыытынан Афродита хайатыгар дьону таһаарар этэ. Кини сүрдээх сэмэй киһи, «дьиҥэ, бэйэбэр диэн сыал туруоруннаҕым дии» диир. Евгений кэргэннээх, үс оҕолоох аҕа.

Валерия Потапова – Оҕо литэрэтиирэтигэр бириэмийэ лауреата

Ахсынньы 18 күнүгэр оҕо литэрэтиирэтигэр меценат Руслан Федотов олохтообут бириэмийэтин –
500 тыһ. солк. сэртипикээти «Бастакы сээн» сэһэнинэн кыайбыт устудьуоҥ­ка Валерия Потаповаҕа  туттарда. Түөрт финалист кинигэтэ бэчээттэнэр буолла.

«Алта» кинигэ кыһатын сала­йааччы Зинаида Архипова, «Саха сирин суруйааччылара» ассоциация бэрэссэдээтэлэ Олег Сидоров уонна урбаанньыт Руслан Федотов буолан, оҕо литэрэтиирэтигэр бириэмийэ олохтуур туһунан сөбүлэспиттэрэ.

Кэскилээнэ Лукина – Бүтүн Арассыыйатааҕы куонкурус лауреата

Горнай улууһун А.Осипов аатынан Бэрдьигэстээх орто оскуолатын саха тылын уонна литэрэтиирэтин учуутала Кэскилээнэ Лукина “Төрөөбүт тыл уонна литэрэтиирэ бастыҥ учуутала” идэ куонкуруһун өрөспүүбүлүкэтээҕи түһүмэҕэр муҥутуур кыайыылаах аатын ылбыта.

Быйыл күһүн куон­курус финалыгар – Карачаево-Черкесс­кэй Өрөспүү­бүлүкэ Черкесс­кэй куоратыгар Бүтүн Арассыыйа­тааҕы түһүмэххэ баран, лауреат буолан, Саха сирин ааттатан кэллэ. Куонкуруска дойду 75 эрэгийиэниттэн барыта 30 тыл учуутала кытынна.

Тополинай ыала Москваҕа наҕараадаланна

Бүтүн Арассыыйатааҕы «Сыл бастыҥ дьиэ кэргэнэ» күөн күрэскэ Томпо Тополинайыттан Варвара уонна Дмитрий Стручковтар «Семья – хранитель традиций» анал аат кыа­­йыылааҕынан буоллулар.

Иллээх ыал – удьуор табаһыттар. Кинилэр дьиэ кэргэн үгэстэрин харыстаан илдьэ сылдьаллар, табаһыттар үлэлэригэр оҕолорун сыһыараллар, үгэһи, сиэри-туому оҕолоругар, сиэннэригэр тиэрдэр баҕалаахтар. Стручковтар түөрт оҕолоохтор. Улахан уол тиэхиньикумҥа үөрэнэр, оттон кыра кыыстара тоҕус ый­­даах.

100 баалы ылбыт оҕолор

Былырыын биир кэлим эксээмэни 23 оҕо 100 баалга туттарбыт эбит буол­лаҕына, ааһан эрэр сылга 27 биридимиэккэ 100 баалы ыллылар:

Литэрэтиирэҕэ: Юлия Тюрюмина (Алдан лиссиэйэ), Анна Будищева (Жатай 2-с нүөмэрдээх оскуолата), София Евстратова (Мииринэй 12-с нүөмэрдээх оскуолата), Елизавета Граф (Мииринэй 23-с нүөмэрдээх ос­­куолата), Мария Савкина (Нерюнгри 1-кы нүөмэрдээх гимназията), Анна Невская (Уус Маайа оскуолата), Полина Евсеенко (Дьокуускай куораттаа­ҕы лиссиэй), Дарина Тимофеева (Дьокуускай к., физика-тиэхиньиичэс­кэй лиссиэй), Мария Осипова (оскуоланы урукку сылга бүтэрбит); химия­ҕа: Илья Манохин (Нерюнгри 2-с нүөмэрдээх гимназията), Владислав Алексеев (Дьокуускай к., өрөспүүбүлүкэтээҕи лиссиэй-интэринээт), Екатерина Цивилёва (Дьокуускай к. физика-тиэхиньиичэскэй лиссиэй); нуучча тылыгар: Феврония Саввинова (Сунтаардааҕы политиэхэньии­чэскэй лиссиэй-интэринээт), Илья Манохин (Нерюнгри 2-с нүө­мэрдээх гимназията), Мария Савкина (Нерюнгри 1-кы нүөмэрдээх гимназията), Иван Спицын (Нерюнгри информационнай-технологическай лиссиэйэ), Нарияна Кириллина (Дьокуускай куораттааҕы лиссиэй), Влада Долженко (Дьокуускай куорат 23-с нүөмэрдээх оскуолата), Инесса Адамова (Амма улууһун Майскай оскуолата), Полина Корчагина (Мииринэй 23-с нүө­­мэрдээх оскуолата), Евдокия Николаева (Арктика норуоттар икки ардыларынааҕы оскуола), Сандаара Саввинова (Кэбээйи улууһун Мастаах оскуолата), Сардаана Егинова (Дьокуускай  к. өрөспүүбүлүкэтээҕи лиссиэй-интэринээт), Давир Дьяконов (өрөспүүбүлүкэтээҕи лиссиэй-интэринээт). Математикаҕа (проф.): Айтал Захаров (Дьокуускай к. физика-тиэхиньии­чэскэй лиссиэй). Информатикаҕа уонна ИКТ: Айтал Захаров (Дьокуускай к. физика-тиэхиньиичэскэй лиссиэй), Тимур Куличкин (Чурапчы гимназията).

Саха кыыһа «II Вице-мисс Россия-2023» буолла

Дойду киин куоратыгар үгэскэ кубулуйбут «Мисс Россия» куонкуруска Саха кыыһа ситиһиилээхтик кытынна.

Ол курдук Любовь Хохолова   «Вице-мисс Россия-2023» буолла. Любовь Хохолова Өлүөхүмэ улууһугар төрөөбүт. Оҕо сааһа Нам улууһугар ааспыт. Билигин Москватааҕы  педагогическай  университекка  үөрэнэр.

Оттон «Мисс Россия — 2023»  ааты  23 саастаах Санкт-Петербург куорат олохтооҕо   Маргарита Голубева ылбыта.