Бүгүн, сэтинньи 30 күнүгэр, СӨ Судаарыстыбаннай Мунньаҕын (Ил Түмэн) уочараттаах пленарнай мунньаҕар бүтэһиктээх ааҕыыга өрөспүүбүлүкэ 2023 уонна 2024-2025 сыллардааҕы судаарыстыбаннай бүддьүөтүн туһунан сокуон барыла ылылынна.
Өрөспүүбүлүкэ 2023 сыллааҕы бүддьүөтүн дохуоттаах чааһа иккис ааҕыыга киллэриллибит уларытыылары учуоттаан туран 272,9 млрд солк. тэҥнэстэ.
Ил Дархан Айсен Николаев бэйэтин этиитигэр госбүддьүөтү бэлэмнээһиҥҥэ уонна ылыныыга үлэлэрин иһин СӨ Судаарыстыбаннай Мунньах (Ил Түмэн) норуодунай дьокутааттарыгар махтанна. Кини улахан үлэ ыытылынна, бу сырыыга 600-тэн тахса уларытыы көрүлүннэ диэн бэлиэтээтэ.
«Билиҥҥи судургута суох кэмҥэ туруктаах бүддьүөт ылылынна. Эһиилгиттэн элбэх социальнай ыстатыйалар киириэхтэрэ, бу хайысхаҕа үлэ салгыы ыытыллыаҕа. 2023 сылга тыа хаһаайыстыбатыгар үбүлээһини улаатыннарар туһунан быһаарыллыбыта. Бу ылыллыбыт миэрэ тыа хаһаайыстыбатын салгыы сайыннарыыга көмө буолуо диэн эрэнэбин», – диэтэ Айсен Николаев.
Ил Дархан өрөспүүбүлүкэҕэ дьоһун суолталаах сүрүн эбийиэктэр Инвестиция бырагырааматыгар киллэриллибиттэрин бэлиэтээтэ. Ол иһигэр онкология киинэ киирбитин эттэ.
Айсен Николаев РФ Судаарыстыбаннай Дууматын дьокутаатттарын уонна, бастатан туран, Галина Данчиковаҕа федеральнай бүддьүөккэ түмүктээх үлэтин иһин махтанна. Баһылык өрөспүүбүлүкэ бүддьүөтүгэр датаассыйа былырыыҥҥы таһымынан хаалбытын, бастакы көрүүгэ биллэрдик сарбылла сыыспытын, ону өрөспүүбүлүкэ салалтата уонна Госдума дьокутааттара бииргэ үлэлээн ситиспиттэрин эттэ.
Түмүккэ, Айсен Николаев 2023 сылга бүддьүөт дохуоттаах чааһын улаатыннарыыга улахан үлэ барыахтааҕын бэлиэтээтэ. Кини Бырабыыталыстыба салалтатыгар уонна Ил Түмэн дьокутааттарыгар туруоруллубут соруктары быһаарарга туох баар сыраларын ууралларыгар ыҥырда.
Өрөспүүбүлүкэ 2023 сыллааҕы бүддьүөтүн дохуоттаах чааһа иккис ааҕыыга киллэриллибит уларытыылары учуоттаан туран 272,9 млрд. солк. тэҥнэстэ уонна уопсайынан, нолуок уонна нолуок дохуотун суотугар, федеральнай бүддьүөттэн уонна судаарыстыбаннай тэрилтэлэртэн босхо киирии суотугар 15,3 млрд солк. улаатта.
Өрөспүүбүлүкэ атын дохуота баар акциялартан дивиден быһыытынан киирэр. Кэлэр сылга дивиденнэртэн 9,1 млрд солк. киирэрэ сабаҕаланар.
Бүддьүөт социальнай хайысхаҕа туһуланар. Социальнай политикаҕа, үөрэхтээһиҥҥэ, култуураҕа, физическэй култуураҕа, сонуну киэҥник тарҕатар средстволарга туһуламмыт госбюджет ороскуота 141,7 млрд солк. (50,1%) буолуо.
Тыа хаһаайыстыбатын өйөөһүҥҥэ кэлэр сылга 14,2 млрд солк., ол иһигэр 0,7 млрд солк. – федеральнай бүддьүөттэн субсидия көрүллүө.
Сокуон барылын иккис ааҕыытын чэрчитинэн 2023 с. өрөспүүбүлүкэ Инвестиционнай бырагыраамата (суол пуондатын үбүн учуоттаабакка) 4 млрд солк. улаатта, онон 39,4 млрд солк. буолуо.
Оттон Национальнай бырайыактары олоххо киллэриигэ туһуламмыт өрөспүүбүлүкэтээҕи бырайыактары үбүлээһиҥҥэ бүддьүөккэ 35,9 млрд солк. көрүллэрэ былааннанар.
Мария Васильева СИА хаартыскалара
Хантан кэлбитэ, ким айбыта биллибэт эрээри, Саҥа дьыл бэйэтэ туспа үгэстээх, биттээх-билгэлээх. Сорох дьон маны…
Ахсынньы 22 күнүгэр алыптаах Саҥа дьыл бырааһынньыгын көрсө, А.Е.Кулаковскай аатынан Норуоттар доҕордоһууларын дьиэтигэр «Саҥа дьыллааҕы…
Мииринэй куоракка борокуратуура 820 тыһ. солк. суумалаах арыгынан суокуоннай суохтук эргиниинэн холуобунай дьыаланы суукка ыытта.…
Анал байыаннай дьайыы кыттыылаахтара уонна кинилэргэ тэҥнээх дьон иккис орто үөрэххэ босхо үөрэнэр кыахтаахтар. Судаарыстыба…
Ааспыкка Саҥа дьылааҕы сандалы солбуллубат олохтооҕо буолбут "саҕынньахтаах селедка" салаат оннугар рулет оҥорору сэргээбиккит. Аны…
Индия, табылыннаҕына, сыл бүтүөр диэри Арассыыйа туристическай бөлөхтөрүгэр визата суох эрэсиими олохтуон сөп диэн Индия…