2023 СЫЛЛААХ «ДЫГЫН ООННЬУУЛАРЫН» КЫАЙЫЫЛААҔА — ВЯЧЕСЛАВ ДЬЯКОНОВ!

Саха дьоно-сэргэтэ успуорду сэҥээрэр, ол тула түмсэр. «Дыгын оонньуулара» ураты суолталаахтарын ким да мэлдьэспэтэ буолуо. Мадьынылар икки күн киирсибиттэрин бары даҕаны тыыммакка да олорон, кыайыыны-хотууну баҕаран көрдүбүт.

Ыһыах түһүлгэтин хас муннугун ахсын ким кыайыылаах буоларын таайа эрэ сырыттыбыт. Бастакы күҥҥэ Артем Варданян (Нам), Николай Матаннанов (Таатта), Вячеслав Дьяконов (Нам) инники күөҥҥэ тахсыбыттара.
Иккис күҥҥэ оҕунан ытыыга, 400 м сүүрүүгэ, хапсаҕайга, таас көтөҕүүтүгэр илин-кэлин түһүстүлэр. Хас биирдии көрүҥ бэйэтин лиидэрин булла.

Икки күн тыҥааһыннаах, олус сэргэх киирсиилэри көрдүбүт.

Ол аата, уопсай түмүк маннык:
1 миэстэ — Вячеслав Дьяконов (Нам)
2 миэстэ — Артём Варданян (Нам)
3 миэстэ — Айсен Ботуев (Үөһээ Бүлүү).

Вячеслав Дьяконов — ХИФУ физкультура уонна успуорт институтун 1 кууруһун устудьуона, Николай Дьяконов уола. Бу холобурунан, чахчы да, утум, ситим салҕанарын көрөбүт.

Кыайыылаахтары эҕэрдэлиибит.

Эльдар Садовников