2024 сыл Саха сирин култуураҕа куодун өрө таһаарыыга ураты буолла

12 мөлүйүөнтэн тахса киһи Саха сирин үгэстэрин уонна култууратын ВДНХ-ҕа “Арассыыйа” норуоттар икки ардыларынааҕы быыстапка-пуорумун экспозициятыттан билистэ.

«Якутия – вселенная Олонхо» экспозиция 100-тэн тахса улахан тэрээһин уонна 200-тэн тахса маастар-кылаас ыытыллар сиринэн буолла. Ону сэргэ,  манна тиһигин быспакка  киинэлэри көрдөрдүлэр, ол эрэгийиэн киинэтигэр болҕомтону уурарга көмөлөстө.

Дойду Култуураҕа министиэристибэтин көмөтүнэн Казахстаҥҥа  улахан култуурунай бырагыраамалаах Саха сирин күннэрэ ыытыллыбыттара. Көрөөччүлэр “Ньургун Боотур” операны, “Кыыс Дэбилийэ” олоҥхону, “Геометрия движения” уонна “Күлүмүрдүүр таас” биир акталаах балеттары биһирээбиттэрэ. Ону сэргэ Кыргызстаҥҥа Суорун Омоллоон аатынан Опера уонна балет тыйаатырын “Улахан гостуруоллара” буолбуттара.

Үүнэр көлүөнэ тыйаатырын кэлэктиибэ Кытай Норуодунай Өрөспүүбүлүкэтин куораттарыгар Хотугу сир норуоттарын номохторунан “Дьол тааһа” испэктээги көрдөрбүтэ.

“Азия оҕолоро” норуоттар икки ардыларынааҕы VIII успуорт оонньууларын култуураҕа тэрээһиннэрин 24 кыттар дойдуттан, дойду 3 федеральнай уокуругуттан, Москваттан уонна Саха сириттэн 69 тыһыынчаттан тахса киһи көрбүтэ.  Ыалдьыттар Арассыыйаҕа Дьиэ кэргэн, өрөспүүбүлүкэҕэ Оҕо саас сылларыгар анаммыт Туймаада ыһыаҕар сылдьыбыттара.

2024 сыллаахха Владивостокка Экэниэмикэ Илиҥҥи пуорумугар Саха сирин култууратын бырагыраамата эмиэ бастыҥынан билиниллибитэ.

“Биһиги бииргэ – Арассыыйа” норуот айымньытын уонна үгэстэрин Бүтүн Арассыыйатааҕы III бэстибээлин  биир былаһааккатынан Дьокуускай буолла уонна Арассыыйа араас эрэгийиэннэрин айар кэлэктииптэрин, эспиэрдэрин уонна маастардарын түмтэ. Бэстибээл сүрүн түгэнэ – “Арассыыйа элбэх омуктаах дьиэ кэргэнэ” телемост Саха сирин Луганскай Норуодунай Өрөспүүбүлүкэни  кытары ситимнээтэ, ол “Культура.РФ” порталга быһа эпииргэ көһүннэ.