2025 сыл саҕаланыаҕыттан суол быһылааныгар өлүү 29,4% үрдээбит

2025 сыл саҕаланыаҕыттан Дьокуускай куоракка тахсыбыт суол саахала былырыыҥҥы бу кэминээҕини кытары тэҥнээтэххэ 8,3%, эчэйии ахсаана 6,5% аҕыйаабыт. Ол эрээри, суол быһылааныгар өлүү 29,4% үрдээбит (17-тэн 22-гэр диэри).

Ону таһынан итирик туруктаах суоппардар кыттыылаах 46 түбэлтэ (17,9% үрдээһин) бэлиэтэммит, ол түмүгэр 11 киһи өлбүт (83,3% үрдээһин) уонна 56 киһи эт-хаан эчэйиитин ылбыт (16,4% намтаабыт) диэн СӨ Суолга куттал суох буолуутун судаарыстыбаннай иниспиэксийэтэ иһитиннэрэр.

Ону тэҥэ тырааныспары ыытар бырааба суох суоппардар кыттыылаах 35 суол быһылаана тахсыбыт, онно 4 киһи өлбүт, 38 киһи эчэйбит.

Саахал тахсыытын аҕыйатар уонна сэрэтэр сыалтан СӨ Суолга куттал суох буолуутун судаарыстыбаннай иниспиэксийэтин үлэһиттэрэ 2025 сыл ахсынньы 2 күнүттэн ахсынньы 21 күнүгэр диэри сулууспаны күүһүрдүү эрэсиимигэр көстүлэр.