2025 сыл сүрүн ситиһиилэрэ: Алексей Петров — Арассыыйа Дьоруойа

Саха сирэ хорсун-хоодуот дьонунан аатырар, дойду устуоруйатыгар элбэх дьоруойу бэлэхтээбитэ, олор истэригэр Аҕа дойду Улуу сэриитин кэмигэр 24 Сэбиэскэй Сойуус Дьоруойа уонна бүгүҥҥү күҥҥэ 12 Арассыыйа Федерациятын Дьоруойа бааллар.

Ааспыт сылга Саха сирэ үс Арассыыйа Дьоруойдаммыта — Андрей Николаевич Григорьев “Тута”, Петр Александрович Киприянов “Монгол”, Петров Алексей Рафаэлович-“Медведь”. Кинилэртэн 12-с Арассыыйа Дьоруойунан “Медведь” позывнойдаах Алексей Петров буолар.

Алексей 1984 сыл ахсынньы 3 күнүгэр Үөһээ Бүлүү улууһун Маҥаас нэһилиэгэр төрөөбүтэ. 39 с туспа гвардейскай мотострелковай биригээдэҕэ сулууспалаабыта, ефрейтор. Арассыыйа Бэрэсидьиэнин 2025 сыл от ыйын 6 күнүнээҕи Ыйааҕынан Арассыыйа Дьоруойа аат иҥэриллибитэ.

Биһиги хаһыаппыт Алексей туһунан госпитальга сыттаҕына кэпсэтэн суруйан турар. Нэһилиэнньэлээх пууннары босхолооһуҥҥа ураты хорсун быһыыны көрдөрбүтэ, тус бэйэтэ өстөөх үс пулеметнай туочукатын, уонунан өстөөҕү уонна байыаннай тиэхиньикэлэри суох оҥорбута, камикадзе-дрону аптамаатынан суулларбыта. Саҥа кэлбит байыастарга инструкторынан сылдьыбыта, араас өрүттээх өйөбүлү оҥорбута.