2025 сыл сүрүн ситиһиилэрэ: М. Е. Николаев аатынан оскуола аһылынна

2025 сылга Билии күнүгэр Дьокуускай куоракка СӨ бастакы Бэрэсидьиэнэ М. Е. Николаев аатын сүгэр 40‑с нүөмэрдээх, өрөспүүбүлүкэҕэ өссө биир улахан оскуола үөрүүлээх быһыыга-майгыга аһылынна.

Оскуола “Ыччат уонна оҕолор” национальнай бырайыагынан тутулунна. 17,2 тыһ. кв. иэннээх, 990 миэстэлээх саамай улахан, бары өттүнэн бастыҥ хааччыллыылаах оскуола буолар.

Саҥа кыһа аһыллар бэлиэ күнүгэр Ил Дархан Айсен Николаев учууталлары, үөрэнээччилэри, төрөппүттэри тиийэн эҕэрдэлээбитэ. “Михаил Николаев үөрэхтээһини куруук өйүүрэ, үөрэтиини-иитиини болҕомтотугар тута сылдьара. Кини үөрэхтээһиҥҥэ киллэрбит кылаатын билинэн туран, Михаил Ефимович аата бу бэртээхэй оскуолаҕа иҥэриллибититтэн үөрэбит”, — диэн бэлиэтээн эппитэ. Тустаах оскуола 1997 сыллаахха СӨ бастакы Бэрэсидьиэнэ Михаил Николаев төрүттээбит Бэрэсидьиэн оскуолаларын ситимигэр 13‑с кыһанан киирбитэ. Манна өрөспүүбүлүкэ үрдүк көрдөрүүлээх гимназиялара, лиссиэйдэрэ хапсаллар.