2025 сыл сүрүн ситиһиилэрэ: Саҥа уһуйааннар

Саха сиригэр 2025 сылга 41 социальнай эбийиэк, ол иһигэр 15 үөрэхтээһин, 6 физкултуура уонна успуорт, 13 доруобуйа харыстабылын уонна 7 култуура тэрилтэлэрин эбийиэктэрэ тутуллаллар. Бу сыл бүтүөр диэри доруобуйа харыстабылын 8 улахан эбийиэгэ тутуллан, үлэҕэ киирдэ.

Кэбээйи сэлиэнньэтигэр Оҕо сайдыытын киинэ — «Мичээр» уһуйаан саҥа дьиэтэ тутуллан үлэҕэ киирдэ. Бу 140 миэстэлээх, 2 этээстээх, 1600 кв. м иэннээх саҥа дьиэ Кэбээйи нэһилиэгин үс уһуйаанын холбоото. Бу уһуйааннар эргэ мас дьиэлэргэ үлэлии олорбуттара.

Саҥа уһуйаан аныгылыы көстүүлээх, хаачыстыбалаах миэбэлинэн, анал тэриллэринэн хааччыллыылаах, куукуналаах, аактабай, спортивнай саалалардаах.

Бэрэсидьиэн В. Путин бигэргэппит Дьокуускай куорат маастар-былаанын чэрчитинэн, 17‑с кыбартаалга бастакы социальнай эбийиэк — уһуйаан саҥа дьиэтэ тутулунна. Бу Кулаковскай уулуссатыгар баар «Улыбка» уһуйаан филиала буолар. Уопсайа 3,7 тыһ. кв. м иэннээх тутуу 240 миэстэҕэ суоттаммыт. Хааччыллыытынан Саха сиригэр биир бастыҥнара. Саҥа тэрилтэҕэ физкултуура, муусука саалалара бааллар, таһыгар спортивнай былаһааккалаах. Манна 12 бөлөххө 240 оҕо сылдьыаҕа.