2025 сыл сүрүн ситиһиилэрэ: СМАРТ — аныгы кэм сыыппаралаах поликлиниката

Ааспыт сылга Дьокуускай куорат Гагарин уокуругар ханна да суох улахан уонна аныгы тутуулаах СМАРТ-поликлиника үлэҕэ киллэрилиннэ.

Биэс мэндиэмэннээх саҥа дьиэ 8,8 тыһыынча кв. м уопсай иэннээх, симиэнэҕэ 600 киһи сылдьар кыахтаах. Эбийиэк эрэгийиэн бырабыыталыстыбатын уонна “ВИС” бөлөх судаарыстыбаннай-чааһынай бииргэ үлэлээһиннэринэн Саха сирин уратыларын уонна килиимэтин усулуобуйатын учуоттаан тутулунна.

Аныгы тэриллэринэн хааччыллыбыт СМАРТ-поликлиниканы сыыппаралаах поликлиниканан ааҕыахха сөп. Бу поликлиникаҕа инникитин 55 тыһ. кэриҥэ киһи сыһыарыллыаҕа. Тус-туспа киирэр ааннаах поликлиникаҕа биир симиэнэҕэ улахан дьон поликлиникатыгар — 300, оҕо поликлиникатыгар 180, дьахтар консультациятыгар 120 киһи сылдьар кыахтаах. Үлэлииргэ уонна эмтэнэргэ табыгастаах усулуобуйа доруобуйа харыстабылын үлэһиттэрэ көмөнү өссө ордук хаачыстыбалаахтык оҥороллоругар көмөлөһүөҕэ.

Манна эспиэрт-кылаастаах 732 сүрүн тэрил таҥылынна, бу тэриллэртэн 70‑ча бырыһыана Арассыыйаҕа оҥоһуллубут. Диагностика уонна терапия отделениелара, килииникэ-диагностика лабаратыарыйата, сардаҥанан диагностика уонна доруобуйаны чөлүгэр түһэрэр эмтээһин отделениелара, суһал көмө кэбиниэтэ, күнүскү стационар, стоматология уонна бэйэ call-киинэ бааллар. Түөрт лиип үлэлиир, аныгы тэриллэринэн, баһаары сэрэтэр систиэмэлэринэн толору хааччыллыылаах.

Поликлиникаҕа мэдиссиинэ бары сулууспалара бааллар, үчүгэйэ диэн, киирэр-тахсар ааннара тус-туспа. Саҥа эбийиэк бырайыага мэдиссиинэ бастакы сүһүөх звенотун көрдөрүүлэрин учуоттаан оҥоһуллубут. Эмтэнээччилэргэ куттал суох буолар усулуобуйата тэрилиннэ. Холобур, кыраадыһа тахсыбыт эбэтэр туох эмэ инпиэксийэлээх киһини кытары эмтэнээччилэр “алтыспаттар”.