2025 сыл сүрүн ситиһиилэрэ: “Сыл учуутала‑2025” кыайыылааҕа — Юлия Макарова

Ахсынньыга үөрэх үлэһиттэрин саамай улахан күөн күрэһэ — Бүтүн Арассыыйатааҕы “Сыл учуутала‑2025” күөн күрэс өрөспүүбүлүкэтээҕи түһүмэҕэ буолан ааста. Муҥутуур кыайыылааҕынан Чурапчы улууһун гимназиятын английскай, кытай тылын учуутала Юлия Макарова буолла.

Онно өрөспүүбүлүкэ үгүс улуустарыттан барыта 19 педагог кытынна. Кыттааччылар «Педагогическай интервью», «Уруок», «Маастар-кылаас», «Блиц-турнир», «Образовательнай форсаж» курдук күөн күрэс тургутуулар ситиһиилээхтик аастылар. Бу иитинэн үлэлэрин уопутун үллэһиннилэр, идэҕэ сатабылларын билиһиннэрдилэр, эспиэртэр ыйытыыларыгар хоруйдаатылар, үөрэх систиэмэтин суолталаах тиэмэлэрин ырытыстылар. Ити курдук хас да түһүмэхтээх түмүк кэнниттэн Чурапчы гимназиятын учуутала Юлия Макарова кыайыылаах үрдүк аатын ылан, эһиил Саха сирин аатыттан Арассыыйаҕа кытта барар чиэскэ тигистэ.