2025 сыл түмүктэрэ: дьиэ-уот тутуута

2025 сыл түмүгүнэн, 800 тыһыынча кв. м. иэннээх олорор дьиэ үлэҕэ киирдэ — бу рекорд. Оттон 2020 сылтан 2025 сылга диэри — бүтүн өрөспүүбүлүкэ үрдүнэн 4 мөлүйүөн кэриҥэ кв. м. үлэҕэ киирдэ.

Сыл сүрүн тиэмэтэ — саахалланар туруктаах дьиэттэн көһөрүү. «2019–2025 сылларга гражданнары саахалланар туруктаах дьиэ пуондатыттан көһөрүү» өрөспүүбүлүкэтээҕи бырагырааманан олорорго табыгаһа суох дьиэни суох оҥорууга дойдуга саамай бөдөҥ бырайыак 55 тыһыынчаттан тахса Саха сирин олохтооҕор саҥа кыбартыыраларга көһөр кыаҕы биэрдэ. Бу сыыппаралар кэннилэригэр бүтүн Саха сирин үрдүнэн саҥа дьиэлэммит дьоннор тураллар.

«Ахсынньыга мин бырагыраама 50-тыһыынчалаах кыттааччытын — Мэҥэ Хаҥалас улууһун Майа сэлиэнньэтиттэн элбэх оҕолоох Дмитриевтар дьиэ кэргэттэрин кытта көрүстүм.

Сорук өссө да ситэри быһаарылла илик, онон үлэни 2026 сылга «Дьиэ-уот» федеральнай бырайыак чэрчитинэн салгыы ыытыахпыт. 56,04 тыһыынча кв. м. саахалланар туруктаах дьиэттэн 3 013 киһини көһөрөр былааннанар. 2030 сылга диэри 465,83 тыһыынча кв. м. дьиэттэн 25,91 тыһыынча Саха сирин олохтооҕун көһөрүү былааннанар.

Саха сирин кэскилин тутар дьон — ыччат туһунан эмиэ толкуйдуур уолдьаста. Уһук Илиҥҥи куортам дьиэ бырайыагынан Дьокуускайга уонна Алдаҥҥа 193 кыбартыыралаах 3 дьиэ тутулунна. 2026 сылга Нерюнгрины уонна Мииринэйи киллэрэн туран, 810 кыбартыыралаах өссө биэс дьиэ үлэҕэ киириэҕэ. Бу устудьуоннарга уонна эдэр исписэлиистэргэ туспа олоҕу саҕалыырга, өрөспүүбүлүкэҕэ хаалан үлэлииргэ-хамсыырга, ыал буоларга туһуланар.

Уонна, биллэн турар, биһиги дьиэлэри эрэ буолбакка — куораттары уларытабыт. Бүгүн Дьокуускайга уһун болдьохтоох комплекснай былаанынан 24 эбийиэк олоххо киирэр, оттон Нерюнгрига маастар-былаан 38 пууннаах.  Өрөспүүбүлүкэ 24 нэһилиэнньэлээх пуунун маастар-былааннара бэлэмнэр», — диэн Ил Дархан Айсен Николаев телеграм-ханаалыгар суруйар.