Булуҥҥа уһуллубут сэлиилэр туһунан документальнай киинэ 2025 сылга сүрэхтэниэ

Булуҥ улууһун Новосибирскай арыыларыгар научнай эспэдииссийэ уһулбут «Сэлиилэр тоҕо суох буолбуттарай?  («Почему вымерли мамонты?») диэн документальнай киинэни 2025 сылга көрдөрөрү былаанныыллар.

Бу туһунан  суруналыыстарга бырайыак салайааччыта уонна режиссер Илья Кравченко иһитиннэрдэ, диэн ТАСС биллэрэр.

«Документальнай киинэ сыала-соруга  — Новосибирскай арыыларга научнай  эспэдииссийэ үлэтин туһунан сырдатыы уонна ыччаты саҥа арыйыыларга сэргэхситии буолар. Документальнай киинэ 2025 сылга тахсара былааннанар. Сайын эбэтэр күһүөрү, — диэтэ Илья Кравченко.

Балаҕан ыйыгар Булуҥ улууһугар актердары кыттыһыннаран Өлүөнэ өрүс тардыытынан киинэни салгыы уһулар былааннаахтар. «Билигин киинэни ыччакка интэриэһинэй гына оҥорорго дьулуһабыт», — диэн кини чопчулаата.