2025 сылга хамнас муҥутуур алын кээмэйэ үрдүөҕэ

Дойду Бэрэсидьиэнэ Владимир Путин 2025 сылга Арассыыйаҕа хамнас муҥутуур алын кээмэйин 22 440 солк. аныырга федеральнай сокуоҥҥа илии баттаата.

Докумуон нуормалыыр быраап аахталарын саайтыгар таҕыста. Билигин бу сылга хамнас муҥутуур алын кээмэйэ 19 242 солк. тэҥнэһэр. Онон кэлэр сыл тохсунньу 1 күнүттэн 16,6% үрдүөҕэ. Бу сокуон 4,2 мөл. үлэһит хамнаһын улаатыннарары сабыдыаллыыр.

Хамнас алын кээмэйин үрдэтии 2030 сылга диэри Арассыыйа сайдыытын национальнай сыалларыттан биирдэстэрэ буолар.

Санаттахха, дойду Бэрэсидьиэнэ Владимир Путин ыам ыйынааҕы Ыйааҕынан хамнас алын кээмэйэ урутаан үрдүөхтээх уонна 2030 сылга ыйга 35 тыһ. солк. тиийиэхтээх.