2025 сылга «Мобильнай быраас» бырайыак географията кэҥиэҕэ

2025 сылтан мобильнай быраастар биригээдэлэрэ Саха сирин арктическай оройуоннарыгар эрэ буолбакка, Саха сирин атын уустук суоллаах уонна ыраах сытар нэһилиэнньэлээх пууннарыгар барыахтара.

Бу туһунан ахсынньы 16 күнүгэр Айсен Николаев «Прямой разговор» биэрии кэмигэр Ньурба оройуонун олохтооҕуттан  киирбит ыйытыыга хоруйдаата.

Санатан эттэххэ, быйыл Доруобуйа харыстабылын министиэристибэтэ Г.И. Турнер аатынан оҕо травматологиятын уонна ортопедиятын исписэлиистрин кытта бииргэ үлэлээһинэ саҕаламмыта. Ол чэрчитинэн, мобильнай быраастар Арктика оройуоннарыгар, ол иһигэр Булуҥ оройуонугар сырыттылар.

«Билигин 2025 сыллааҕы былаан оҥоһуллар, ол иһигэр Саха сирин атын оройуоннарыгар уустук суоллаах нэһилиэнньэлээх пууннара бааллар. Маннык көһө сылдьар мобильнай быраастар федеральнай үнүстүүттэртэн бастыҥ исписэлиистэр кыттыылаах эмиэ оҥоһуллуохтара», — диэтэ Ил Дархан Айсен Николаев.