2025 сылга «Роскосмос» МКС-ка туристары ыытан саҕалыа

2025 сылтан туристар МКС-ка көтүөхтэрин сөп буолуоҕа. Маннык кыах баар буолбутун туһунан «Роскосмос» хампаанньа иһитиннэрдэ диэн «Главкосмос» саайтыгар иһитиннэрдилэр.

Туристар Казахстантан Байконур космодромун ыстаансыйатыттан көтүөхтэрэ. МКС ыстаансыйатыгар диэри космоска көтүү бириэмэтэ үс чаас кэриҥэ буолуоҕа. МКС ыстаансыйатыгар көтөн тиийбит туристар манна 10 хонук устата сылдьыахтара.

Бу иннинэ космонавтар ким баҕалааҕы 10 ый устата Звезднай куоракка бэлэмниэхтэрэ. Туристарга анаан анал скафандрдары уонна оборудование  оҥоруохтара. «Бу киһи олоҕун устата саамай бэлиэ түгэнинэн буолуоҕа. Ону кытта космостан бэйэ хараҕынан Сир ийэни көрөргө сэдэх кыах бэриллэр», — диэн «Главкосмос» саайтыгар суруйдулар. Итини таһынан космоска көтөргө анал билии, үөрэх, дьоҕур наадата суох диэн ыйдылар. Тустаах бэлэмнэниини туристарга космонавтар бырагыраама чэрчитинэн үөрэтиэхтэрэ.