2025 сылга Саха сирин 198 тыһыынча олохтооҕун босхо эминэн хааччыйдылар

Саха сиригэр 2025 сылга чэпчэтиилээх эминэн хааччыйыы бырагырааматынан 198 тыһыынчаттан тахса киһи хааччылынна.

Бу туһунан эрэгийиэн доруобуйаҕа харыстабылын миниистирэ Лена Афанасьева “Доруобуйа харыстабылын эйгэтигэр үбүлээһин уонна социальнай мэктиэлээһиннэри хааччыйыы сытыы боппуруостара”  төгүрүк остуолга иһитиннэрдэ.

“Бу өрөспүүбүлүкэ олохтооҕун 19% кэриҥэ. Кинилэртэн 70 тыһыынча киһи эминэн хааччыйыыга федеральнай чэпчэтиилээх. Ол эрээри, 64% (45 тыһыынча) өҥөнөн туһанар, ол эбэтэр натуральнай көрүҥүнэн эми ылар. 36% федеральнай чэпчэтиилээхтэр бу чэпчэтиини харчынан ылаллар, ый аайы бу өҥөнөн туһамматтарын иһин уу харчынан туһаналлар”, — диэтэ миниистир.

Лена Афанасьева ыарыынан страховой түбэлтэ тахсар түгэнигэр федеральнай чэпчэтиилээхтэргэ өрөспүүбүлүкэ бүддьүөтүн суотугар ырысыап суруйаллар диэн быһаарда.

“Страховой түгэн үөскээһинэ эминэн хааччыйыыга бүддьүөккэ охсор. Ол түмүгэр көрүллэр үп чэпчэтиинэн туһанааччылар наадыйыыларын толору кээмэйинэн саппат. Кыһалҕаны быһаарары 122 нүөмэринэн “итии лииньийэни” арыйдыбыт. Пациеннары хааччыйыыга табаар тобоҕун хаттаан тыырдыбыт”, — диэтэ кини.

Кэлэр сылга эминэн хааччыйыыга 3,8 млрд солкуобай торумнаммыт.

Төгүрүк остуолга санитарнай авиация көтүүлэрин үбүлээһин уонна булгуччулаах мэдиссиинискэй страховкалааһын базовай бырагырааматыгар киирбэт медико-санитарнай суһал бастакы көмөнү оҥорор медүлэһиттэргэ анал социальнай төлөбүрдэр тустарынан кэпсэттилэр.