2025 сылга тыа хаһаайыстыбатыгар 15 млрд солк. тахса сууманы ыытыахтара

Саха сиригэр тыа хаһаайыстыбатын өйөөһүн кээмэйин 2025 сылга бу сыллааҕы таһымыгар оннунан хаалларыахтара.

Бу туһунан Тыа хаһаайыстыбатын уонна ас-үөл бэлиитикэтин миниистирэ Артем Александров иһитиннэрдэ. 2025 сылга уонна 2026-2027 сыллардааҕы былааннаах кэмҥэ өрөспүүбүлүкэ бүддьүөтүн туһунан сокуон барылын Ил Түмэн пленарнай мунньаҕар бастакы ааҕыыга ылылынна.

«Бастакы ааҕыыга бэтэринээрийэ управлениетын бүддьүөтүн учуоттаан, эһиил тыа хаһаайыстыбатын үбүлээһинигэр 8 млрд солк. кэриҥэ үбү-харчыны уктубут. Сокуон барылын иккис ааҕыытыгар 15,7 млрд солк. суумалаах үбүлээһин билиҥҥи кээмэйинэн оннунан хаалларыахпыт диэн эрэнэбит. Бу салааны Ил Дархан Айсен Николаев уонна Ил Түмэн бэрэссэдээтэлэ Алексей Еремеев өйүүллэрин көрөбүт», – диэн Артем Александров бэлиэтээтэ.

Миниистир этэринэн, үбүлээһин оннунан хаалларыы инвестиционнай бэлиитикэҕэ соруктары уонна былааннары ситиһиигэ биллэрдик өйөбүлүнэн буолуоҕа. Артем Александров этэринэн, аграрнай салааны 2030 сылга диэри сайыннарыы Ил Дархан саҥа стратегическай Ыйааҕынан быһаарыллыбыта.