2026 сыл — Арассыыйа норуоттарын сомоҕолоһууларын сыла

РФ Бэрэсидьиэнэ Владимир Путин 2026 сылы Арассыыйа норуоттарын сомоҕолоһууларын сылынан биллэрдэ.

Бэрэсидьиэн тыл этэригэр, норуоттар икки ардыларынааҕы дьиҥнээх сомоҕолоһуу уонна бойобуой бырааттыы сыһыан холобурунан билигин байыаннай  дьайыы кыттыылаахтара — саллааттар уонна эпписиэрдэр буолалларын бэлиэтээбитэ. Кинилэр Арассыыйа иһин сиэрдээх охсуһууну бииргэ ыыталлар уонна кыргыс хонуутугар дойду биир кэлим норуот буоларын дакаастыыллар. Бу усулуобуйаҕа гражданнар икки ардыларыгар иирсээни үөскэтэ сатыыр ханнык баҕарар дьайыылары кытаанахтык бохсор наадалаах диэн ыйыллыбыта.

«Сыаллара-соруктара биллэр – биһиги сомоҕолоһуубутун хамсата сатааһын. Итиниэхэ биһиги утарылаһааччыларбыт ханнык баҕарар төрүөтү уонна сылтаҕы туһаналлар: олох-дьаһах түбэлтэлэрин, миграция боппуруостарын – балаһыанньаны аймыырга, иирсээни күөдьүтэргэ, уустугурдан ыытарга. Кинилэр радикал бөлөхтөргө, ол эбэтэр дьиҥнээх террористическай ньымаларга, олоҕураллар», — диэн Владимир Путин эттэ.

Сыл аайы ураты тиэмэни аныыр үгэс 2007 сыллаахтан, ол кэмҥэ Нуучча тылыгар анаммытыттан, саҕаламмыта. Онтон салгыы маннык тиэмэлэр анаммыттара:

• 2008 — Дьиэ кэргэн сыла;
• 2009 — Ыччат сыла;
• 2010 — Учуутал сыла;
• 2011 — Арассыыйа космонавтикатын сыла;
• 2012 — Арассыыйа устуоруйатын сыла;
• 2013 — Тулалыыр эйгэни харыстааһын сыла;
• 2014 — Култуура сыла;
• 2015 — Литэрэтиирэ сыла;
• 2016 — Экология сыла;
• 2017 — Ураты харыстанар айылҕа сирдэрин-уоттарын сыла;
• 2018 — Үтүө доброволец уонна волонтер сыла;
• 2019 — Тыйаатыр сыла;
• 2020 — Өйдөбүнньүк уонна Албан аат сыла;
• 2021 — Билим уонна технология сыла;
• 2022 — Арассыыйа норуоттарын култуурунай нэһилиэстибэлэрин сыла;
• 2023 — Педагог уонна уһуйааччы сыла;
• 2024 — Дьиэ кэргэн сыла;
• 2025 — Аҕа дойдуну көмүскээччи сыла.