Эһиил муус устар 1 күнүттэн социальнай биэнсийэлэри индексациялыахтара

Эһиил муус устар 1 күнүттэн социальнай биэнсийэлэри уонна судаарыстыбаттан бэриллэр биэнсийэлэри 6,8% үрдэтиэхтэрэ. Бу туһунан Госдуума «Биир ньыгыл Арассыыйа» фракциятын дьокутаата Алексей Говырин иһитиннэрдэ.

«Социальнай биэнсийэлэр уонна судаарыстыба хааччыйыытынан бэриллэр биэнсийэлэр муус устар 1 күнүттэн индексацияланыахтара. Үрдээһин кээмэйэ 6,8 бырыһыаҥҥа тэҥнэһиэ диэн сабаҕаланар», — диэн Алексей Говырин тылларын РИА Новости саайта сырдатар.

Дьокутаата этэринэн, социальнай биэнсийэ инбэлиит оҕолорго, оҕо саастарынан инбэлииттэргэ уонна биэнсийэҕэ тахсалларыгар ирдэнэр үлэ ыстааһа суох дьоҥҥо ананар. Индексацияҕа хапсар судаарыстыбаннай биэнсийэлэри Арассыыйа гражданнарын сорох чэпчэтиилээх категориялара ылаллар. «Судаарыстыбаннай  биэнсийэ, холобур, «Блокадаламмыт Ленинград олохтооҕо» бэлиэнэн наҕараадаламмыт эбэтэр радиационнай саахаллартан эмсэҕэлээбит дьоҥҥо ананар», — диэн кини эбэн эттэ.