2026 сылга 800 тыһыынчаттан тахса квадратнай миэтэрэ дьиэни үлэҕэ киллэрэр сорук турар

Тутуу миниистирэ Виктор Романов «Актуальное интервью» биэриигэ эппитинэн, 2026 сылга 806 тыһыынча квадратнай миэтэрэ дьиэни үлэҕэ киллэрэр былааннаахтар.

2025 сыл түмүгүнэн Саха сиригэр 804,8 тыһ. кв. м дьиэ тутуллубут. Бу – өрөспүүбүлүкэ устуоруйатыгар саамай үрдүк көрдөрүү (2024 сыллааҕар 107% элбэх). Виктор Романов бэлиэтээбитинэн, билигин сүрүн сорук – бу тэтими тутан хаалыы.

Ааспыт 2-3 сыл иһигэр тутуу эйгэтигэр оҥоһуллубут өйөбүл билигин дьиҥнээх түмүгүн биэрэр. Холобура, ааспыт сылга элбэх этээстээх дьиэлэри тутуу 4% үрдээбит (344 тыһ. кв. м). Оттон тус олорор дьиэни тутуу өссө күүскэ сайдар – 450 тыһыынчаттан тахса квадратнай миэтэрэ киирбит.

2030 сылга диэри сылга 832 тыһыынча квадратнай миэтэрэҕэ тахсар былааннаахтар. Бу үлэ Арассыыйа Бэрэсидьиэнэ Владимир Путин бигэргэппит «Олох инфраструктурата» диэн национальнай бырайыагын иһинэн ыытыллар.