2026 сылга диэри Нерюнгрига доруобуйа харыстабылын 14 эбийиэгин саҥардыахтара

Нерюнгри Оройуоннааҕы киин балыыһатыгар 2026 сылга диэри доруобуйа харыстабылын 14 эбийиэгин саҥардыахтара. Ол туһунан Ил Дархан Айсен Николаев Ил Түмэҥҥэ туһаайан этиитигэр иһитиннэрбитэ.

“Быйыл Нерюнгри Киин балыыһатын 8 блога салгыы саҥардылынна, Геологтар проспектарыттан суол олохтоохтук өрөмүөннэннэ. 2025 сылга балыыһаны саҥа тэриллэринэн сэбилээһин былааннанар. 2026 сыл бүтүүтэ  14 эбийиэк толору саҥардыллыаҕа. Өрөмүөн үлэтин кэмигэр мэдиссиинэ көмөтүн хаачыстыбата мөлтүө суохтаах. Манна ураты болҕомтону уураргытыгар көрдөһөбүн”, — диэтэ Айсен Николаев.

Билигин маастар-былаан чэрчитинэн балыыһа комплексын «А», «Б»  уонна «В» эмтиир блоктарын олохтоохтук саҥардыы үлэтэ ыытыллар. Аныгыскы уочаратынан инфекция отделениета, патологоанатомическай куорпус, ас-үөл  блога уонна үс диспансер чөлүгэр түһэриллиэхтэрэ.

Санатан эттэххэ, дойду бэрэсидьиэнэ Владимир Путин 2023 сыл балаҕан ыйыгар Дьокуускай куонна Нерюнгри куораттар маастар-былааннарын бигэргэппитэ. Нерюнгри Оройуоннааҕы киин балыыһатын эбийиэктэрин төрдүттэн уларытыы Нерюнгри куорат маастар-былаанын биир сүрүн соругунан буолар.

2018 сылтан Саха сирин куораттарыгар уонна  улуустарыгар “Доруобуйа харыстабыла” национальнай бырайыак көмөтүнэн доруобуйа харыстабылын 106 саҥа эбийиэгэ, үс улахан эбийиэк – Перинатальнай киин, Сүрэх-тымыр киинэ уонна Онкология диспансера үлэҕэ киллэрилиннилэр.

Хонууга, Чурапчыга уонна Уус Маайаҕа балыыһа комплекстара аһылыннылар. Майаҕа, Сангаарга, Намҥа, Ньурбаҕа, Бүлүүгэ уонна Үөһээ Бүлүүгэ балыыһа комплекстара тутуллаллар. Аммаҕа уонна Дьокуускайга 2 №-дээх поликлиника тутуута түмүктэнэр.